Aston Villa është kampionia e re dhe fituesja e trofeut të UEFA Europa League për vitin 2026, pas një triumfi spektakolar 3:0 përballë gjermanëve të Freiburg-ut.
Pa mbaruar ende pjesa e parë, në minutën e dytë shtesë, Emiliano Buendía dyfishoi rezultatin, duke e dërguar Aston Villa-n në dhomat e zhveshjes me një avantazh të qartë dhe qetësi psikologjike. Shpresat e Freiburg-ut për një përmbysje u shuan në minutën e 58-të të pjesës së dytë, kur Morgan Rogers shënoi golin e tretë, duke kthyer pjesën e mbetur të lojës në një festë të pastër për klubin e Birmingham-it.
Me këtë sukses, trajneri Unai Emery shkruan një faqe të re në historinë e futbollit botëror. Ky është trofeu i pestë i Europa League për teknikun spanjoll, një rekord absolut dhe i paarritshëm, pas tre titujve me Sevillën dhe një triumfi me Villarreal-in.
Finalja e këtij viti ishte e gjashta në karrierën e Emery-t në këtë kompeticion, dhe ai bëhet trajneri i parë që fiton një trofe europian me tre klube të ndryshme, duke konfirmuar statusin e tij si një nga më të mëdhenjtë në historinë e Europa League.
Për Aston Villa-n, ky triumf i jep fund një pritjeje të gjatë prej 44 vitesh, që nga fitorja historike e Kupës Europiane në vitin 1982 kundër Bayern Munich. Një brez i ri lojtarësh dhe tifozësh shkruan tani kapitullin e vet të lavdisë, duke shtuar një tjetër trofe madhështor në vitrinën e “Villa Park”.
