Argjentina nis epokën pa Messin me humbje, Uruguai triumfon 2-1 në “Bombonera”

Kombëtarja e Argjentinës e ka nisur me humbje epokën pa Lionel Messin, duke u mposhtur me rezultatin 2-1 nga Uruguai në një ndeshje miqësore të zhvilluar në stadiumin legjendar “La Bombonera”.

Takimi ishte i pari pas rinovimit të kontratës së trajnerit Lionel Scaloni deri në vitin 2030, por kampionët e botës nuk arritën të bindnin në fushën e lojës, përballë një Uruguai që tregoi organizim dhe efikasitet.

Pavarësisht se miqtë nuk regjistruan asnjë goditje në kuadrat gjatë pjesës së parë, arritën të kalonin në avantazh pas një aksidenti në mbrojtjen argjentinase. Një përpjekje e Lisandro Martinez për të larguar topin përfundoi në mënyrë fatale, pasi topi u përplas me Leonardo Balerdi dhe përfundoi në rrjetë.

Në pjesën e dytë, Uruguai thelloi epërsinë në 2-0. Pas një goditjeje nga këndi, Maximiliano Araujo përfitoi nga situata dhe dërgoi topin në rrjetë, duke vështirësuar edhe më shumë misionin e vendasve.

Argjentina pati vështirësi të mëdha për të depërtuar në mbrojtjen kundërshtare, ndërsa mungesa e Messit u ndje veçanërisht në fazën krijuese dhe në aftësinë për të ndryshuar ritmin e lojës.

Megjithatë, hyrja në fushë e Gianluca Prestiannit i dha më shumë gjallëri sulmit vendas. Në minutën e 72-të, talenti argjentinas realizoi një depërtim të shkëlqyer nga krahu i majtë dhe shërbeu një asist për Julian Alvarez, i cili ngushtoi diferencën në 2-1.

Në minutat e mbetura, Argjentina tentoi të rikthehej në lojë, por pa arritur të shmangte humbjen. Uruguai administroi avantazhin deri në vërshëllimën përfundimtare, duke marrë një fitore të rëndësishme në “La Bombonera”.