Anulohet gara e MotoGP në Phillip Island, Marc Marquez mbetet lider i Botërorit

Gara e së dielës në Phillip Island, në kuadër të kampionatit botëror të MotoGP-së, është anuluar për shkak të kushteve të vështira atmosferike. Si rrjedhojë, Marc Marquez nuk pati mundësinë ta thellonte epërsinë e tij në klasifikimin e përgjithshëm ndaj Jorge Martin, i cili po rikuperohet nga lëndimi.

Vendimi për anulimin e garës u mor nga organizatorët pas reshjeve të vazhdueshme të shiut dhe mungesës së dukshmërisë në pistë. Kushtet e krijuara konsideroheshin të rrezikshme për pilotët, ndërsa pamundësia e funksionimit të helikopterit të emergjencës ishte një tjetër faktor vendimtar. Përveç garës së MotoGP-së, u anuluan edhe garat e kategorive Moto2 dhe Moto3.

Phillip Island, që ka qenë pjesë e kalendarit të MotoGP-së që nga viti 1997, pritej të priste garën për herë të fundit, pasi nga sezoni i ardhshëm garat do të zhvillohen në Adelaide.

Megjithatë, për t’i përshëndetur tifozët e pranishëm, organizatorët lejuan pilotët të dilnin në pistë për një xhiro parakalimi. Piloti australian Jack Miller dhuroi spektakël për të pranishmit, duke bërë disa rrotullime të gomave para tribunave.

Pas anulimit të garës, Marc Marquez vazhdon të kryesojë klasifikimin e pilotëve, me 10 pikë epërsi ndaj Jorge Martin dhe 50 pikë më shumë se Marco Bezzecchi. Mbetet të shihet se kur Martin do të rikthehet në pistë, pas rrëzimit të pësuar të shtunën.

Ndalesa e radhës e Botërorit të MotoGP-së është Çmimi i Madh i Malajzisë, ndërsa më pas në kalendar janë garat në Katar, Portugali dhe Valencia, në Spanjë. Zhvillimi i garës në Katar mbetet ende i pakonfirmuar.