Andrea Pirlo pritet të emërohet së shpejti trajneri i ri i Kombëtares së Italisë, me një kontratë që do ta mbajë në krye të “Azzurrëve” deri në përfundim të Kupës së Botës 2030.
Italia është në kërkim të një trajneri të ri që nga dorëheqja e Gennaro Gattusos pas dështimit në “play-off”-in e Kupës së Botës 2026.
Drejtori teknik Paolo Maldini dhe këshilltari special Leonardo konfirmuan në konferencën për shtyp se fillimisht kishin zhvilluar bisedime me Carlo Ancelottin, ndërsa më pas kontaktuan edhe Pep Guardiolën.
Megjithatë, sipas raportimeve të fundit, Guardiola e refuzoi ofertën për të qëndruar më pranë familjes së tij pas një dekade në krye të Manchester Cityt, duke bërë që vëmendja të përqendrohet te Pirlo.
Sipas La Gazzetta dello Sport, Sky Sport Italia dhe Calciomercato, zyrtarizimi i emërimit të 47-vjeçarit mund të bëhet para përfundimit të fundjavës.
Pirlo aktualisht është nën kontratë me United FC në Ligën Profesionale të Emirateve të Bashkuara Arabe, detyrë që e mori në korrik të vitit 2025. Megjithatë, ndërprerja e kësaj marrëveshjeje nuk pritet të paraqesë vështirësi.
Marrëveshja e tij me Federatën Italiane të Futbollit pritet të jetë e vlefshme deri në fund të Kupës së Botës 2030, ndërsa paga e tij do të jetë rreth 1.5 milion euro në sezon.
Kjo shumë është dukshëm më e ulët se ajo që do të kërkohej për emra si Carlo Ancelotti, Pep Guardiola, Roberto Mancini apo Antonio Conte.
Ashtu si paraardhësi i tij Gennaro Gattuso, Pirlo ishte pjesë e kombëtares italiane që fitoi Kupën e Botës në vitin 2006.
Në karrierën e tij si trajner, Pirlo fitoi Kupën e Italisë gjatë sezonit të tij te Juventusi, më pas drejtoi Karagümrük në Turqi dhe së fundmi ishte në krye të Sampdorias në Serie B, përpara se të merrte drejtimin e United FC në Emiratet e Bashkuara Arabe.
