PËRGATITI: BESMIRE KLUNA
Rreth 25% e viktimave nga aksidentet në trafik, në vitin 2024, kanë qenë këmbësorë, gjithsej 26 persona që humbën jetën.
Aksidentet e këtij lloji me fatalitet, sipas Policisë, më së shumti ka pasur në rajonin e Prishtinës.
‘’5 kanë qenë në zonën e përgjegjësisë së Njësisë për Kontrollin e Autostradave, 7 në rajonin e Prishtinës, 2 në rajonin e Gjilanit, 2 në të Ferizajt, 3 në të Prizrenit, 3 në të Gjakovës, 2 në të Pejës dhe 2 në rajonin e Mitrovicës së Jugut’’, njoftoi Policia.
Lista me lokacionet përfshinë autostrada, magjistrale, rrugë në brendësi të qyteteve, por edhe në fshatra.
Ndërsa sipas përgjigjes së policisë për ATV-në, shkaktarët kryesorë janë gabimet e ngasësve të automjeteve.
‘’Në 15 raste ishte shkaktar mospërshtatja e shpejtësisë, 9 raste nga pakujdesia e shoferëve, dhe 2 raste konsiderohet si shkaktar vetë këmbësorët’’, deklaruan nga Policia.
Njohësi i komunikacionit, Nol Dedaj, thotë se institucionet duhen analizuar faktorët dhe vendet e aksidenteve, që të ndërmarrin masa konkrete në terren.
‘’Për me zbrit këtë numër këtë përqindje, duhet me identifiku vendi ku ka ndodh me këmbësorë pastaj mosha e tyne, veprimi i kahjes motivi I lëvizjes se këmbësorit atëherë mundemi me I marrë masat preventive’’, tha Dedaj.
Policia në vazhdimësi apelon për kujdes dhe respektim të rregullave në trafik, edhe nga shoferët, por edhe nga këmbësorët./atvlive.tv/
