Një person ka vdekur dhe një tjetër është lënduar në një aksident që ka ndodhur mbrëmë, në fshatin Llapashticë të Podujevës.
Zëdhënësi i Policisë për rajonin e Prishtinës, Agron Borovci, ka bërë të ditur se aksidenti ka ndodhur rreth orës 20:00, në rrugën “Qëndresa” në Llapashticë të Podujevës.
Ai ka bërë të ditur se personi i lënduar është dërguar në Qendrën Klinike Universitare të Kosovës (QKUK), ku po vazhdon trajtimin mjekësor për shkak të lëndimeve të marra nga aksidenti.
“Rreth orës 20:00, është raportuar për një aksident trafiku të ndodhur në rrugën “Qëndresa” në fshatin Llapashticë të komunës së Podujevës. Nga informatat e para bëhet e ditur se në aksident janë përfshirë dy vetura. Një person ka humbur jetën ndërkaq një tjetër është dërguar në QKUK, ku po vazhdon trajtimin mjekësor për shkak të lëndimeve të marra nga aksidenti. Policia ka dalë në vendin e ngjarjes dhe po ndërmerr masat e nevojshme për lehtësimin e qarkullimit rrugor si dhe ka nisur punën për hetimin e shkaqeve që kanë sjellë deri te aksidenti”, ka thënë Borovci.
