Përgatiti: Haris Ademi
Temperaturat e larta të ditëve të fundit, e kanë rritur konsumin e energjisë elektrike në Kosovë për 13%.
Meqë blloku B1 është në remont vjetor, KESCO-ja thotë se prodhimi vendor nuk po e mbulon kërkesën, prandaj është dashur import i rrymës, në shifra milionëshe.
“Konsumatorët po i përdorin kondicionerët për ftohje të ambientit. Për çdo ditë jemi duke importuar nga 1 milion euro”, tha zëdhënësja e KESCO-s, Margarita Rashiti.
Sipas njohësit të sektorit, Lulzim Syla, janë disa faktorë pse gjatë verës rritet konsumi i rrymës.
“Rritet konsumi gjatë verës shkaku i sezonit turistik në gjithë regjionin, prandaj është rritë çmimi. Rritja shtesë e konsumit të energjisë vjen si rezultat i ardhjes së diasporës”, tha Syla.
Kohë pas kohe, KESCO-ja thotë se blen rrymë edhe në bursën shqiptare të energjisë “ALPEX”. Megjithatë, në disa raste, çmimet këtu janë më të larta se në bursat e tjera rajonale. Për shembull, më 15 korrik, çmimi më i lartë në ALPEX ishte 843 euro në orën 22, ndërsa në bursën hungareze “HUPX”, 700 euro në orën 21.
Por ka raste kur çmimi në bursën shqiptare është më i lirë.
Megjithatë, kjo situatë, sipas njohësit Azmer Duleviç, nuk alarmon për krizë gjatë dimrit.
“Shkëmbimin e energjisë elektrike, kur ka nevojë Kosova, do ta marrë nga Shqipëria dhe anasjelltas. Kjo marrëveshje siguron stabilitet energjetik, për sigurim me energji elektrike”, tha Duleviç.
Tregtia mes Kosovës dhe Shqipërisë në bursën ALPEX nisi më 31 janar të këtij viti.
