Përgatiti: Armand Hoti
Nëntoka e Stan Tërgut, qe e heshtur të hënën. Minatorët e ndërrimit të parë të minierës së “Trepçës”, refuzuan t’i përvishen punës.
Ata hynë në grevë, meqë ende nuk i kanë marrë pagat e muajit prill.
Nga sindikata e minatorëve të “Trepçës” thonë se menaxhmenti prishi përsëri marrëveshjen e nëntorit, e cila ndali grevën dhjetëditore të punëtorëve të minierës.
“Arsyeja kryesore e futjes në këtë grevë ose protestë, është që nuk janë realizuar pagat. Ka qenë afati kohor dhe sipas një marrëveshje dhe sipas marrëveshjes së arritur me menaxhmentin dhe me bordin dhe me një pjesë të deputetëve, ka qenë afati kohor që nga data 5 deri më datën 10 të kryhen këto obligime”, tha kryetari i sindikatës së minatorëve të “Trepçës”, Ibrahim Jonuzi.
Kryesindikalisti Ibrahim Jonuzi nuk tregoi sa do të zgjasë greva.
Megjithatë, ai thotë se drejtori i minierës, Shyqyri Sadiku, iu kumtoi minatorëve se nëse i kthehen punës, pagat do të ekzekutohen të premten.
“Datë se kur do i marrim pagat, nuk ka diçka konkrete, përveç se drejtori i minierës se nëse shkojnë në punë, këta do i marrin pagat në ditën e premte. Mirëpo, minatorët nuk kanë pranuar të hyjnë në vendin e punës, pa marrë sqarime konkrete nga kryeshefi ekzekutiv”, tha Jonuzi.
Kështu i tha edhe kryeshefi i “Trepçës”, Bashkim Kurti, ATV-së, përmes telefonit.
Eksperti i ekonomisë, Zekirija Shabani, ia lë fajin menaxhmentit dhe qeverisë për çalimin financiar të gjigantit të dikurshëm metalurgjik.
“Ish-gjiganti metalurgjik tash nuk është në gjendje me operu normalisht, pak për shkak të menaxhmenteve ndër vite për ta zhvilluar si ndërmarrje dhe më shumë për shkak të mungesës së interesit të Qeverisë për të investuar dhe gjeneruar të hyra tamam për ta përpunuar xehen dhe koncentratin si duhet “Trepça” është në këtë gjendje që sot nuk ka mundësi t’i paguajë as punëtorët e vet”, tha Shabani.
Për t’i siguruar pagat e rreth 1200 punëtorëve sa ndërmarrja numëron në total, shpesh është dashur intervenimi i qeverisë, përmes subvencionimit.
Ndërkaq, njësia kryesore e “Trepçës”, në muajin mars nuk e prodhoi asnjë gram koncentrat të plumbit dhe zinkut, në mungesë të reagencave e dinamitit.
