Përgatiti: Driton Sadiku
Në ditën e fundit të muajit, kompania Elektrosever ka nisur shpërndarjen e faturave të energjisë në 4 Komunat Veriore.
Qytetarët e Mitrovicës së Veriut, Leposaviqit, Zveçanit e Zubin-Potokut do të paguajnë nga 21.60 euro në formë paushalli, të llogaritur për shpenzim të energjisë, shkruan Evropa e Lirë.
Fatura mban logon e kompanisë Elektrosever, që është në pronësi të kompanisë publike energjetike të Serbisë, Elektroprivreda Srbije.
Fatura është printuar në të dyja gjuhët. Siç njoftoi Elektroseveri, përveç faturës përdoruesit do të pajisen me një kopje të kontratës për inspektim.
“Me pagesën e një shume prej 21.60 eurosh, Marrëveshja e Furnizimit me kompaninë ‘Elektrosever’ do të konsiderohet e lidhur. Zyrtarët e Elektroseverit do t’ua sjellin qytetarëve për nënshkrim Marrëveshjet për furnizimin me energji elektrike”, thuhet në njoftimin e Elektrosever-it.
Pagesa në formë paushalli do të vazhdojë edhe në muajt e ardhshëm, deri në vendosjen e njehsorëve të rinj.
Megjithatë, edhe vendosja e njehsorëve të financuar nga Bashkimi Evropian mund të marrë kohë disa muaj, meqë procesi është në fazën e tenderimit.
Nga 1 Janari, përgjegjësia e plotë për energjinë elektrike në veri, i takon Elektroseverit.
Në janar, Rregullatori i Energjisë i hoqi KOSTT-it përgjegjësinë për mbulimin e humbjeve në katër komunat në veri.
Që nga përfundimi i luftës, dëmi buxhetor si pasojë e mos-pagesës së energjisë në këtë pjesë të vendit, llogaritet të jetë rreth 350 milionë euro.
