Përgatiti: Nora Luta
Dëshmi rrëqethëse kishte dhënë Artan Krasniqi në gjykimin ndaj të akuzuarit për krime lufte në Butovc të Prishtinës, Dushko Arsiq.
Krasniqi, vetëm 15 vjeç, gjatë prillit të 1999-s, nga maltretimet fizike e psikike që ka thënë se ia shkaktoi Arsiq, pasojat i vuan edhe sot.
Ai gjatë dëshmisë kishte identifikuar Arsiqin, duke thënë se e kishte parë në mesin e grupit që kishte shtënë në drejtim të Brahim Shalës, të cilin të plagosur, e kishin detyruar ta bartë në shpinë.
Prokuroria Speciale në fjalën përfundimtare të enjten, duke u bazuar në dëshminë e tij dhe të tjera prova ka kërkuar dënim maksimal për Arsiqin.
Mbrojtja e ka kundërshtuar dhe ka tentuar ta ndërlidhë denoncimin ndaj Arsiqit me çështje pronësore. Vetë i akuzuari përsëriti versionin e tij edhe gjatë kësaj seance.
“Ata më kanë kërcënuar që unë të tërhiqem nga padia për pronën, sepse do ta pësoj, nuk e kam ditur se do të akuzohem për krime lufte”, deklaroi i akuzuari Dusko Arsiq.
“Kjo çështje ka lindur 23 vjet pas luftës, ngrihet kallëzim penal kundër njeriut që ka jetuar e punuar në Kosovë, e i martuar edhe atë me grua shqiptare, përnjëherë dëshiron të shesë tokën, kush janë blerësit të gjithë nga familja Krasniqi, nga fshati i njëjtë”, tha Nebojsha Vlaiq, avokat i Dusko Arsiqit.
Derisa me kërkesë të trupit gjykues, u pajtua që të jetë i shkurtër në kohë gjatë elaborimit të fjalës përfundimtare, prokurori Atdhe Dema reagoi kur mbrojtja shfrytëzoi më shumë se një orë, me qëllimin sipas tij të krijojë huti në publik.
Gjykimi, gjatë të cilit u dëgjuan 12 dëshmitarë, 9 të PSRK-së, dhe tre të mbrojtjes e u mbajtën dhjetë seanca të shqyrtimit kryesor, nisi vitin e kaluar.
Arsiq ishte arrestuar në dhjetor të 2021-s, në një nga pikëkalimet kufitare me Serbinë.
