Zgjedhjet lokale në veriun e Kosovës do të mbahen këtë të diel, ndërsa kandidatët shqiptarë shprehen të gatshëm për të marrë pjesë në votime dhe për të marrë përgjegjësi.
Dy kandidatët Eden Atiqi nga Lëvizja Vetëvendosje dhe Betim Osmani nga Iniciativa Qytetare, thonë se janë duke bërë fushatë dhe se situata në veri është relativisht e qetë, transmeton Paparaci.
Atiqi tha se ekziston një dozë e pasigurisë tek qytetarët, por duke marrë parasysh se në veri gati çdo vjet ka zgjedhje, elektorati atje është i kalitur me situata të tilla.
“Elektorati është i mësuar me këtë situatë dhe ne kemi shtuar elektoratin atje”, tha Atiqi për RTK, sipas të cilit, situata atje është më e sigurt se sa paraqitet, ndërsa u shpreh i gatshëm edhe për ta drejtuar komunën pas të hënës.
Ndërsa Betim Osmani ishte më skeptik sa i përket sigurisë, derisa kërkoi që qeveria të jetë sa më aktive në veri. Ai po ashtu tha se si Iniciativë ka muaj që janë duke bërë fushatë, me idenë që të ketë sa më shumë qytetarë në zgjedhje. Madje ai tha se në veri pritet të dalin në zgjedhje edhe qytetarë nga komuniteti serb.
Dy kandidatët që folën edhe për idetë partiake për zhvillimin e komunave, kthimin e qytetarëve, ndërtimi e shtëpive, zhvillimin e shëndetësisë dhe infrastrukturë. Ata thanë se do të mundohen të krijojnë ura bashkëpunimi në veri.
