Përgatiti: Arian Hajdaraj
Dyshimet për keqpërdorime me rezervat shtetërore i dërguan hetuesit policorë herët mëngjesin e së premtës në zyrët e Ministrisë së Industrisë dhe Tregtisë.
Pas disa orë bastisje, ata dolën me dokumente e kompjuterë.
E të arrestuar nga objekti u nxorën Hafiz Gara dhe Irfan Lipovica, të dy zyrtarë të lartë në këtë ministri.
Ndërkohë hetuesit policorë për të njëjtat dyshime zhvilluan edhe një aksion, në biznesin dhe shtëpinë e Ridvan Muharremit.
Pas afro tri orëve bastisje, nga objekti u nxor Muharremi nën pranga të Policisë, dhe u dërgua fillimisht në Prokurorinë Speciale për intervistim.
Avokati i tij tha se posedojnë prova të mjaftueshme, që sipas tij gjatë fazës së hetimeve do të dëshmojnë për pafajësinë e klientit të tij.
Tre të arrestuarit janë dërguar në mbajtje prej 48 orësh.
Në një komunikatë për media, Prokuroria Speciale teksja njoftoi për veprat penale që dyshohen të arrestuarit, tha se gjatë bastisjes janë siguruar dhe sekuestruar prova materiale.
“Tre personat e arrestuar, R.M. H.G dhe I.L. dyshohen për veprat ‘’Keqpërdorim i detyrës zyrtare’’, si dhe ‘’Dhënie të ndihmës në kryerjen e veprës penale të Keqpërdorimit të detyrës zyrtare’’. Brenda afateve ligjore kohore do të bëhet kërkesë për caktimin e paraburgimit. Ndërkaq, gjatë bastisjes janë siguruar dhe sekuestruar prova materiale të cilat do të përdoren për procedurë të mëtutjeshme hetimore”, thuhet në njoftimin e Prokurorisë Speciale.
Aksioni është zhvilluar pas publikimit të disa audio-incizimeve nga gazeta “Nacionale”, në të cilat dëgjohen dy zyrtarë të MINT-it të cilët pretendojnë se vaji i paguar nga Polonia nuk iu bashkua rezervës shtetërore. Sipas atyre incizimeve, njësoi ndodhi edhe me një pjesë të grurit. /atvlive.tv
Edicionin Qendror të lajmeve në ATV e gjeni në videon më poshtë:
