Përgatiti: Arton Hamiti
Kështu në mënyrë të organizuar jo, por serbët vazhdojnë të japin dorëheqje nga Policia e Kosovës në veri.
Teksa një ditë me parë, u raportua se tre pjesëtarë serbë të gjeneratës së fundit zhveshën uniformen, presidentja e Kosovës, Vjosa Osmani, tha të premten se numri i serbëve që dhanë dorëheqje ka arritur në shtatë.
“Ka tashmë informata të konfirmuara, sipas hetimeve të institucioneve tona përgjatë këtyre javëve që, rrezikimi i këtyre pjesëtarëve, frikësimi, shantazhimi, vijnë drejtpërdrejt nga Serbia. Burimin e kanë në Serbi, ky shtet që fatkeqësisht vazhdon me agresion të hapur në raport me Kosovën”, tha Osmani.
Po ashtu sipas Presidentes, me presionin që presidenti Aleksandar Vuçiq, po ushtron mbi serbet e Kosovës, po i shkel marrëveshjet e Brukselit.
“Veprime të tilla janë shkelje flagrante e Marrëveshjeve të Brukselit, të cilat edhe kanë paraparë që një numër i policëve serbë të jenë të komuniteteve, pra të jenë serbë, varësisht nga kompozicioni i komunave. Unë pres nga BE-ja që të ndërmarrë masa ndaj Serbisë dhe Vuçiqit për shkelje të marrëveshjes së Brukselit”, tha Osmani.
Duke premtuar angazhim personal, që t’iu ndihmojë serbëve në Kosovë të triumfojnë ndaj “frikës, ministri për Komunitete dhe Kthim, Nenad Rashiq, tha se e di saktësisht me çfarë presioni janë përballur policët e rinj.
“Fatkeqësisht, ndoshta nuk është asnjë serb i Kosovës që të paktën një herë në jetë të mos i ketë ndjerë personalisht kërcënimet e egra nga ‘forca e padukshme malore’, që shkatërron çdo vepër e çdo dëshirë për bashkëjetesë në Kosovën tonë të bukur, me metodat e saj shkatërruese”, tha Rashiq.
Për largimet e fundit të policëve serbë nga Polica e Kosovës ka reaguar edhe ministri i Brendshëm, ndërsa, kryeministri Albin Kurti nuk iu përgjigj pyetjeve të gazetarëve për këtë çështje.
Rreth 600 policë serbë në katër komunat veriore patën dhënë dorëheqje nga Policia e Kosovës në nëntor të vitit të kaluar, si shenjë proteste ndaj vendimeve të Qeverisë.
Pas dorëheqjeve, institucionet kosovare shpallen konkurs për pranim të policëve të rinj, duke i punësuar 74. Prej tyre, 46 ishin nga komuniteti serb. /atvlive.tv
Edicionin Qendror të lajmeve në ATV e gjeni në videon më poshtë:
