Gjyqtarja nga Peja, Jeta Zeka, ka shënuar një arritje të rëndësishme për karrierën e saj dhe për basketbollin kosovar, pasi është nominuar për të gjykuar dy ndeshje të garës evropiane FIBA EuroCup Women.
Sipas njoftimit të Federatës së Basketbollit të Kosovës (FBK), Zeka do të bëhet gjyqtarja e parë femër nga Kosova që do të ndajë drejtësinë në garat evropiane të klubeve të organizuara nga FIBA.
Angazhimi i saj i parë do të jetë më 14 tetor 2026, në Campobasso të Italisë, në ndeshjen ndërmjet Magnolia Basket Campobasso dhe Cinkarna Celje.
Ndërkaq, më 21 tetor 2026, gjyqtarja pejane do të jetë pjesë e ekipit të gjyqtarëve në përballjen ndërmjet GEAS Basket SSDRL dhe Panathinaikos A.C., e cila do të zhvillohet në Milano të Italisë.
Ky nominim përbën një moment historik për gjykimin në basketbollin kosovar dhe një hap të rëndësishëm drejt rritjes së përfaqësimit të gjyqtareve nga Kosova në garat ndërkombëtare.
Arritja e Jeta Zekës është një dëshmi e përkushtimit dhe profesionalizmit të saj, duke e vendosur Kosovën në hartën e gjykimit evropian të basketbollit.
