Presidenti i FIFA-s, Gianni Infantino, ka kërkuar falje publike pasi propozimi i tij për shitjen e një pjese të të drejtave komerciale të Kupës së Botës investitorëve privatë shkaktoi reagime të forta dhe pakënaqësi brenda qeverisë së futbollit botëror.
Sipas raportimeve, gjatë një mbledhjeje të drejtuesve të FIFA-s në Marok, Infantino pranoi se mënyra se si u paraqit ideja ishte e gabuar. Ai theksoi se në asnjë moment nuk kishte synuar të anashkalonte federatat anëtare në vendimmarrje për çështje me rëndësi kaq të madhe.
BBC raporton se, në një letër drejtuar 211 federatave anëtare, presidenti i FIFA-s ka shprehur “falje të sinqerta” për trajtimin e këtij propozimi, duke premtuar se situata të ngjashme nuk do të përsëriten në të ardhmen.
Në të njëjtin dokument thuhet se drejtuesit e FIFA-s kanë riafirmuar mbështetjen e plotë për Infantinon, pavarësisht debatit që ka shkaktuar kjo çështje.
Zhvillimet vijnë në një moment vendimtar për zviceranin, i cili synon të sigurojë një mandat të katërt në krye të FIFA-s. Megjithatë, polemikat e fundit kanë ngritur pikëpyetje mbi nivelin e mbështetjes që ai do të gëzojë në zgjedhjet e ardhshme.
Afati për paraqitjen e kandidaturave për postin e presidentit të FIFA-s është 18 nëntori, ndërsa zgjedhjet do të zhvillohen gjatë Kongresit të FIFA-s në Marok, në mars të vitit 2027.
Infantino mbledh urgjentisht drejtuesit e FIFA-s në përpjekje për të konsoliduar mbështetjen para zgjedhjeve
Për t’u zgjedhur president i FIFA-s, një kandidat duhet të sigurojë të paktën 106 vota nga 211 federatat anëtare.
