Barcelona ka zyrtarizuar një tjetër përforcim të rëndësishëm për sezonin e ri. Klubi katalanas ka prezantuar sulmuesin gjerman Karim Adeyemi, i cili ka firmosur një kontratë që e mban në “Spotify Camp Nou” deri më 30 qershor të vitit 2031.
24-vjeçari vjen nga Borussia Dortmundi, pas një marrëveshjeje që u zhvillua larg syrit të publikut dhe u finalizua vetëm pasi futbollisti kaloi me sukses vizitat mjekësore dhe hodhi firmën mbi kontratën e re.
Transferimi u konfirmua përmes kanaleve zyrtare të Barcelonës dhe përfaqëson afrimin e dytë të verës për skuadrën e drejtuar nga Hansi Flick, i cili vazhdon ndërtimin e ekipit për sezonin e ardhshëm.
Sipas marrëveshjes mes dy klubeve, Barcelona do t’i paguajë Borussia Dortmundit 22 milionë euro, ndërsa shuma mund të rritet edhe me 7 milionë euro të tjera në formë bonusesh, të lidhura me paraqitjet e lojtarit dhe sukseset e skuadrës. Klubi gjerman ka ruajtur gjithashtu 20 për qind të fitimit nga një transferim i ardhshëm i Adeyemit, një detaj që luajti rol kyç në arritjen e marrëveshjes.
Adeyemi mbërriti në Barcelonë me avion privat së bashku me familjen, përpara se të përfundonte të gjitha procedurat e nevojshme për t’u bërë zyrtarisht pjesë e gjigantit katalanas.
Me shpejtësinë, teknikën dhe aftësinë për të luajtur në disa pozicione të repartit ofensiv, Adeyemi pritet të sjellë më shumë dinamizëm në sulmin e Barcelonës dhe të jetë një nga armët kryesore të Hansi Flick në sezonin e ri.
Klubi katalanas shpreson që reprezentuesi gjerman të konfirmojë potencialin e tij edhe në La Liga, duke u shndërruar në një nga emrat më të rëndësishëm të projektit të ri të Barcelonës.
