Harry Kane ka mbyllur një sezon të jashtëzakonshëm, duke u shpallur fitues i “Këpucës së Artë” në Evropë për edicionin 2025/26.
Sulmuesi i FC Bayern Munich dominoi në Bundesliga me 36 gola të shënuar, duke u konfirmuar si golashënuesi më i mirë në kontinent.
Kane ishte vendimtar gjatë gjithë sezonit, duke treguar efikasitet të lartë dhe formë të jashtëzakonshme para portës kundërshtare. Me këtë sukses, anglezi vazhdon të forcojë pozitën e tij si një nga sulmuesit më të mirë dhe më konstantë në futbollin modern.
Në renditjen përfundimtare të “Këpucës së Artë”, ai la pas emra të mëdhenj të futbollit botëror si Erling Haaland, i cili përfundoi i dyti me 27 gola, dhe Kylian Mbappé në vendin e tretë me 25 realizime.
Ky është një tjetër trofe individual për Kane, i cili po kalon një periudhë fantastike me Bayernin dhe mbetet figurë kyçe e skuadrës gjermane në të gjitha garat.
Në këtë listë bie në sy edhe emri i Vedat Muriqi. Sulmuesi i RCD Mallorca është renditur në vendin e katërt, pas një sezoni shumë të mirë në La Liga.
Muriqi realizoi 23 gola në 37 ndeshje, duke qenë lojtari më vendimtar i skuadrës spanjolle gjatë gjithë sezonit dhe një nga sulmuesit më të spikatur të kampionatit, pavarësisht rënies së Mallorcas nga elita e futbollit spanjoll.
