Manuel Neuer është shumë pranë rikthimit të madh me Kombëtaren e Gjermanisë, pasi trajneri Julian Nagelsmann thuhet se ka vendosur ta rikthejë veteranin si portierin numër një për Kampionatin Botëror të ardhshëm.
Sipas raportimeve të “Sport Bild”, tekniku gjerman tashmë ia ka komunikuar vendimin edhe Oliver Baumannit, i cili ka qenë portieri titullar në mungesë të Neuerit. Nagelsmann besohet se i ka bërë të qartë se, nëse rikuperimi i kapitenit të Bayern Munich vazhdon sipas planit, ai do të jetë zgjedhja e parë në turneun më të madh të futbollit.
Megjithatë, Federata Gjermane ende nuk ka bërë një konfirmim zyrtar lidhur me këtë çështje.
Pavarësisht humbjes së mundshme të vendit të titullarit, Baumann ka treguar profesionalizëm maksimal, duke i garantuar stafit teknik se është i gatshëm të udhëtojë në Botëror edhe si portier rezervë.
Në anën tjetër, shqetësimet për gjendjen fizike të Neuerit nuk janë zhdukur plotësisht. Portieri 39-vjeçar u largua nga ndeshja e fundit e Bayern Munich ndaj Kolnit për shkak të një problemi në pulpë, çka ngriti dyshime për gatishmërinë e tij.
Sidoqoftë, sipas “Bild”, ekzaminimet mjekësore nuk kanë zbuluar ndonjë dëmtim serioz strukturor, ndërsa stafi mjekësor po monitoron me kujdes çdo hap të rikuperimit të tij.
Neuer pritet të jetë i gatshëm edhe për finalen e Kupës së Gjermanisë kundër Stuttgartit, por portieri legjendar nuk dëshiron të rrezikojë me ngarkesa të panevojshme në stërvitje, sidomos në prag të Kupës së Botës.
Lista zyrtare e Gjermanisë për Botërorin pritet të publikohet të enjten në orën 13:00, ndërsa rikthimi i Neuerit si titullar mund të jetë një nga lajmet më të mëdha për “Panzerët” para nisjes së turneut.
