Përzgjedhësi i Kombëtares së Francës, Didier Deschamps, ka sqaruar arsyet pse mesfushori i Real Madrid, Eduardo Camavinga, mbeti jashtë listës së Francës për Kupa e Botës 2026.
Deschamps pranoi se sezoni i vështirë dhe dëmtimet kanë ndikuar drejtpërdrejt në vendimin e tij, ndërsa theksoi se konkurrenca në mesfushë është shumë e fortë.
“Camavinga po e mbyll një sezon të vështirë, në të cilin ka luajtur pak për shkak të dëmtimeve. Ai është ende shumë i ri”, deklaroi fillimisht trajneri francez.
“Më duhet të bëj zgjedhje dhe të ndërtoj strukturën e skuadrës. Por mund ta imagjinoj sa i zhgënjyer është sot”, shtoi Deschamps.
Në konferencën për shtyp, ai e bëri edhe më të qartë arsyetimin e tij, duke theksuar se forma dhe mungesat gjatë sezonit i kushtuan lojtarit vendin në ekip.
“Sezoni i tij i kushtoi vendin. Edhe dëmtimet gjithashtu. Konkurrenca për pozicionin është shumë e fortë. Cama është mes atyre që janë të zhgënjyer. Ai është ende i ri. Ai ishte këtu në mars”, u shpreh përzgjedhësi francez.
Deschamps shtoi se nuk ka asnjë dyshim për cilësitë e Camavingas, por e kupton zhgënjimin e tij për këtë vendim.
“Nuk dyshoj për atë që është i aftë të bëjë. Por sot ai ka çdo të drejtë të jetë i mërzitur me mua. E kuptoj”, deklaroi ai.
Sa i përket portierit të Paris Saint-Germain, Lucas Chevalier, Deschamps shpjegoi se zgjedhja për rolin e portierit të tretë kërkon karakteristika të veçanta, ndërsa vlerësoi sezonin pozitiv dhe entuziazmin e Robin Risser, faktorë që ndikuan në vendimin final.
