Këshilli i Mediave të Shkruara të Kosovës (KMShK) në mbledhjen e rregullt ka shqyrtuar gjithsej 8 ankesa. Anëtarët e Kuvendit të KMShK-së kanë vendosur që të miratohen tri nga to, një të miratohet pjesërisht, dy të refuzohen dhe dy ankesa të shpallen të patrajtueshme.
Ankesat kishin të bënin me pretendimet për shkeljen e kapitujve të caktuar të Kodit të Mediave të Shkruara të Kosovës, përkatësisht Kapitullit II – Raportimi i së vërtetës, Kapitullit IV – E drejta për t’u përgjigjur, Kapitullit V – Personat e përfshirë në incidente, aksidente, të arrestuar apo të akuzuar për vepra penale, Kapitullit VI – Trajtimi i tragjedive personale, mbrojtja e fëmijëve dhe të miturve dhe Kapitullit VII – Privatësia dhe mbrojtja e burimeve.
KMShK ka miratuar ankesën e Nasuf Hasanit kundër Insajderi.org shkrimi me titull “’Tragjedia’ e Avokatit të Kryeparlamentares: Kur Oda e Avokatëve të lë pa ‘Kënaqësi Jete’”, duke konstatuar se janë shkelur kapitujt II dhe IV të Kodit të Mediave të Shkruara të Kosovës, të cilët kanë të bëjnë me raportimin e së vërtetës, përkatësisht të drejtën për t’u përgjigjur.
KMShK ka miratuar ankesën e Kushtrim Reshitajt kundër Rahoveci24.com për publikimin e fotografisë së një mituri dhe cilësimeve ndaj tij, duke konstatuar se është shkelur Kapitulli VI i Kodit të Mediave të Shkruara të Kosovës, i cili ka të bëjnë me raportimin për të miturit.
KMShK ka miratuar ankesën e Fatjon Bytyqit kundër Sinjali.com për publikimin e fotografisë së një qytetari, bashkë me pretendimet se ai është kryes i veprave penale, duke konstatuar se është shkelur Kapitulli V i Kodit të Mediave të Shkruara të Kosovës, i cili ka të bëjnë me prezumimin e pafajësisë,
KMShK ka miratuar pjesërisht ankesën Ministrisë së Sportit dhe Rinisë kundër Nacionale.com, lidhur me pretendimet për largimin e një fotografie nga zyra e ministrit, duke konstatuar se është shkelur pjesërisht Kapitulli II i Kodit të Mediave të Shkruara të Kosovës, i cili ka të bëjë me raportimin e së vërtetës.
KMShK nuk e ka miratuar (e ka hedhur poshtë) ankesën e Granit Gojanit kundër Nacionale.com lidhur me publikimin e disa shkrimeve, duke konstatuar se nuk janë shkelur kapitujt II dhe VII të Kodit të Mediave të Shkruara të Kosovës, të cilët kanë të bëjnë me raportimin e së vërtetës, përkatësisht mbrojtjen e burimeve dhe privatësinë, ashtu siç pretendon pala ankuese.
KMShK nuk e ka miratuar (e ka hedhur poshtë) ankesën e Ardian Berishës kundër Buletiniekonomik.com për shkrimin me titull “Konsulencat për ZRrE përfunduan te kompania e ish-drejtorit të tarifave”, duke konstatuar se nuk janë shkelur kapitujt II dhe IV të Kodit të Mediave të Shkruara të Kosovës, të cilët kanë të bëjnë me raportimin e së vërtetës, përkatësisht të drejtën për t’u përgjigjur, ashtu siç pretendon pala ankuese.
KMShK e ka shpallur të patrajtueshme ankesën e Limi Project Sh.P.K dhe Rinesa Sh.P.K
kundër Berat Buzhalës, pasi që KMShK nuk ka kompetencë të merret me ankesat ndaj individëve, në këtë rast ndaj një gazetari.
KMShK e ka shpallur të patrajtueshme ankesën e Adriana Hoxhiqit, përfaqësuar nga avokati Arbër Shala, kundër faqes në Facebook “Veriu i Kosovës”, pasi që nuk ka kompetencë të trajtojë përmbajtjet e publikuara në rrjetet sociale.
