Jimmy Donaldson, i njohur në mbarë botën si MrBeast, ka reaguar ndaj një vlerësimi që thotë se ai ka shpërndarë rreth 170 milionë euro përmes videove të tij në YouTube.
Sipas tij, shuma reale mund të jetë edhe më e madhe, pasi nuk e ka bërë kurrë një llogaritje të saktë të atyre që ka dhuruar.
Në fillimet e karrierës, MrBeast fitonte vëmendje duke u dhuruar miqve makina dhe shuma të mëdha parash.
Me kalimin e viteve, sfidat dhe projektet e tij janë bërë shumë më të mëdha.
Sot bashkëpunon me krijues të tjerë të njohur dhe ka lançuar edhe spektaklin ‘Beast Games’ në platformën Amazon Prime Video, ku pjesëmarrësit konkurrojnë për çmime të mëdha financiare.
Përveç kësaj, MrBeast ka organizuar edhe sfida të tjera të mëdha, si një garë me 50 ‘streamerë’ të njohur, ku ata patën mundësinë të fitonin rreth 918 mijë euro për fansat e tyre.
Po ashtu, realizoi edhe një enigmë me çmim prej 918 mijë eurosh gjatë eventit sportiv ‘Super Bowl’.
Një pjesë e madhe e parave shpërndahet edhe përmes kanalit të tij bamirës ‘Beast Philanthropy’, i cili ndihmon njerëz në nevojë në mbarë botën.
Ndërkohë, kompania e tij ‘Beast Industries’ ka krijuar edhe një fond të veçantë, të njohur si “Jimmy’s Fund”, që përdoret për ide dhe projekte bamirësie.
Për këtë arsye, është e vështirë të përcaktohet shuma e saktë që ka dhuruar në total.
