Ushtria izraelite ka bërë të ditur se më shumë se 80 avionë luftarakë të forcave ajrore kanë goditur “infrastrukturë kyçe ushtarake të regjimit iranian” në Teheran dhe në Iranin qendror.
Sipas ushtrisë, në mesin e objektivave ishte edhe universiteti ushtarak Imam Hossein i Korpusit të Gardës Revolucionare Islamike (IRGC) në kryeqytetin iranian, i cili sipas saj “përdorej për trajnimin e oficerëve të IRGC dhe si kompleks grumbullimi”, raporton theguardian, transmeton Sinjali.
Forcat e Mbrojtjes së Izraelit gjithashtu thanë në një postim në platformën X se kanë shënjestruar depo të raketave balistike dhe infrastrukturë nëntokësore të komandës së raketave, si dhe vende lëshimi në perëndim dhe në qendër të Iranit, për të cilat pretendojnë se ishin të drejtuara ndaj Izraelit.
Postimi vazhdon:
“Këto sulme dobësojnë aftësinë e regjimit iranian për të qëlluar ndaj civilëve izraelitë.”
Ushtria izraelite tha më herët të shtunën se kishte nisur sulme të reja “në shkallë të gjerë” ndaj objektivave në Teheran.
