Duke vlerësuar organizimin e një ceremonie speciale nga Kolegji AAB, Këshilli i Ambasadorëve Amerikanë përmes një letre për rektorin Lulzim Tafa, ka shprehur kënaqësinë dhe falënderimet për vizitën që realizuan në muajin maj.
Në letrën e cila u dërgua në emër të delegacionit të Këshillit të Ambasadorëve shkruan se pjesëmarrësit ishin të entuziasmuar si me ceremoninë e pritjes ashtu edhe me diskutimet joformale që patën me studentët e Kolegjit AAB.
“Studentët tuaj janë të zgjuar, të mirinformuar dhe kërkues. Delegacioni ynë dhe anëtarët që diskutuan me ta gjatë drekës thanë se ky ishte momenti më i veçantë që patën gjatë vizitës së tyre në Ballkanin Perëndimor”.
Tutje për Çmimin Ndërkombëtar për Demokraci dhe Integrim për Kryetarin e Këshillit të Ambasadorëve Amerikanë Timothy Chorba nga rektori i Kolegjit AAB thanë se e mbajnë në një vend tejet të veçantë në zyrën e Këshillit në mënyrë që ta shohin të gjithë. Ky çmim ishte ndarë për kontributin që SHBA-të dhe diplomacia amerikane kanë dhënë në shtetformim dhe demokracinë e Kosovës.
Në fund të kësaj letre ata ftuan rektorin e Kolegjit AAB Lulzim Tafa që të vizitojë zyrën e Këshillit të Ambasadorëve Amerikanë në Washington, në mënyrë që të kthejnë mikpritjen e Kolegjit AAB.
Vizita e Këshillit të Ambasadorëve Amerikanë u realizua me 11 maj me rastin e “101 vjetorit të Marrëdhënieve Diplomatike Shqipëri – SHBA dhe 15 vjetorit të Marrëdhënieve Diplomatike Kosovë – SHBA”, ku morën pjesë edhe Anëtarë të Këshillit të Ambasadorëve Shqiptarë.
