Në Kaliforni ka nisur një proces gjyqësor me rëndësi të veçantë ndaj kompanive të mëdha të rrjeteve sociale, Instagram dhe YouTube, të cilat akuzohen se kanë ndërtuar platforma të qëllimshme për të nxitur varësi te përdoruesit e rinj.
Gjyqi, i zhvilluar në Gjykatën e Lartë të Los Angeles, shqyrton ndikimin e këtyre platformave në shëndetin mendor të fëmijëve dhe adoleshentëve. Avokati i paditëses K.G.M., Mark Lanier, tha se klientja e tij kishte zhvilluar probleme serioze shëndetësore për shkak të varësisë nga rrjetet sociale. “Kompanitë ndërtuan makineri për të varur trurin e fëmijëve, dhe e bënë këtë me vetëdije”, deklaroi ai.
Lanier argumentoi se Meta, kompania mëmë e Instagram, dhe Google, pronar i YouTube, nuk paralajmëruan përdoruesit për rreziqet e mundshme. Ai prezantoi dokumente dhe email-e të brendshme, ku drejtuesit e kompanive kërkonin rritjen e kohës së përdorimit për të përmbushur objektivat e biznesit.
Mbrojtja e kompanive mohoi lidhjen e problemeve të paditëses me rrjetet sociale, duke e atribuar atë te faktorë familjarë dhe rrethana personale, përfshirë neglizhencë dhe abuzim që ajo kishte përjetuar që në moshë të vogël.
Gjyqi pritet të zgjasë rreth gjashtë javë dhe mund të krijojë precedent për mijëra procese të ngjashme në SHBA. Seancat do të përfshijnë dëshmitë e ekspertëve, familjarëve të fëmijëve, ish-punonjësve të Meta-s dhe drejtuesve të lartë të industrisë, përfshirë Mark Zuckerberg, Adam Mosseri dhe Neal Mohan.
Në të njëjtën kohë, 29 prokurorë të përgjithshëm kërkojnë nga gjykata që Meta të ndryshojë ndjeshëm funksionimin e platformave, duke përfshirë mbylljen e llogarive për përdorues nën 13 vjeç, fshirjen e të dhënave të tyre dhe ndalimin e përdorimit të algoritmeve që mund të nxisin varësi. Një grup tjetër prej 18 shtetesh kërkon kufizime kohore, çaktivizimin e funksioneve si “scroll-i i pafund” dhe ndalimin e filtrave që ndryshojnë pamjen.
Snapchat dhe TikTok, të cilat fillimisht ishin pjesë e procesit, arritën marrëveshje me paditësen muajin e kaluar dhe nuk janë më palë në gjyq.
