Komisioni Evropian ka paralajmëruar TikTok-un se mund të përballet me gjoba të larta nëse nuk ndryshon mënyrën e funksionimit të platformës, e cila sipas Brukselit nxit varësinë dhe dëmton shëndetin mendor, veçanërisht tek fëmijët dhe të rinjtë.
Sipas rezultateve paraprake të hetimit, TikTok nuk ka marrë masa të mjaftueshme për të vlerësuar ndikimin që funksionet e tij kanë në shëndetin fizik dhe psikologjik të përdoruesve. Komisioni thekson se disa elemente kyçe të platformës janë projektuar për të mbajtur përdoruesit të angazhuar për periudha të gjata, duke injoruar pasojat negative.
Si shembuj të ndryshimeve të nevojshme, BE përmend heqjen e funksionit të “scroll-it të pafund”, vendosjen e pushimeve efektive gjatë përdorimit të aplikacionit, kufizimin e aktivizimit automatik të videove, si dhe rregullimin e algoritmit të rekomandimeve që personalizon përmbajtjen në shkallë të lartë.
Komisioni Evropian kërkon që TikTok ta ndryshojë rrënjësisht dizajnin e shërbimit të tij në tregun evropian.
Shqetësim i veçantë për fëmijët dhe adoleshentët
BE e akuzon platformën se injoron sinjale të rëndësishme të mbrojtjes së përdoruesve, si përdorimi i aplikacionit gjatë natës nga fëmijët. Komisarja evropiane për Digjitalizimin, Henna Virkkunen, deklaroi se këto masa janë të domosdoshme “për të mbrojtur minorenët tanë dhe shëndetin e tyre”.
Sipas Komisionit, shpërblimi i vazhdueshëm me përmbajtje të reja e fut trurin e përdoruesve në një gjendje “autopiloti”, duke nxitur sjellje kompulsive dhe duke dobësuar vetëkontrollin, veçanërisht tek të rinjtë. Studime të shumta shkencore e lidhin këtë model përdorimi me rritjen e varësisë digjitale.
Hetim nën ligjin DSA
Hetimi ndaj TikTok-ut nisi në shkurt të vitit 2024 dhe është rasti i parë kundër kësaj platforme nën ligjin e ri të BE-së për Shërbimet Digjitale (Digital Services Act – DSA). Ky ligj synon të garantojë transparencë më të madhe, mbrojtje të përdoruesve dhe luftë kundër përmbajtjeve të paligjshme në internet.
DSA konsiderohet problematik nga qeveria e presidentit amerikan Donald Trump dhe nga disa gjigantë teknologjikë amerikanë, të cilët e shohin atë si një kufizim të fortë ndaj mënyrës së funksionimit të platformave digjitale.
TikTok mohon akuzat
TikTok i ka hedhur poshtë akuzat e Komisionit Evropian, duke i quajtur të pabaza, dhe ka paralajmëruar se do të mbrohet me të gjitha mjetet ligjore. Nëse qëndrimi i BE-së konfirmohet, kompania mund të gjobitet deri në gjashtë për qind të xhiros së saj vjetore globale.
