Ylli i Los Angeles Lakers, LeBron James, ka regjistruar edhe një rekord tjetër në karrierën e tij të jashtëzakonshme, duke u përzgjedhur për herë të 22-të radhazi në ndeshjen All-Star të NBA-së. Këtë herë, ai është përfshirë në formacion si lojtar rezervë.
James, i cili mungoi në 14 ndeshjet e para të sezonit 2025–26 për shkak të problemeve me nervin shijatik, ka zhvilluar deri tani 31 paraqitje, me një mesatare prej 21.9 pikësh për ndeshje.
“Nuk ishte aspak qëllimi im të nisja sezonin, të humbisja 14 ndeshje dhe më pas të mendoja se do të isha një All-Star”, u shpreh LeBron për gazetarët pas humbjes 112–100 të Lakers ndaj New York Knicks, raporton BBC.
Në atë përballje, LeBron James dhe Luka Dončić realizuan së bashku 52 pikë, duke shtuar edhe 20 kërcime dhe 14 asistime, por kontributi i tyre nuk mjaftoi për t’i dhënë fitoren skuadrës nga Los Angelesi.
“Qëllimi im i vetëm ishte të rikthehesha dhe të luaja basketboll në nivelin më të lartë që e dija se mund ta arrija. Kisha humbur parasezonin, kampin stërvitor dhe përgatitjet verore – gjëra që nuk më kishin ndodhur kurrë gjatë karrierës sime. Për këtë arsye, sinqerisht nuk e kisha mendjen te All-Star-i”, tha James.
LeBron ishte përzgjedhur edhe për All-Star-in e vitit 2025, por nuk kishte mundur të aktivizohej për shkak të një dëmtimi.
Në Konferencën Perëndimore, si lojtarë rezervë për ndeshjen All-Star u zgjodhën gjithashtu Kevin Durant (Houston Rockets), Devin Booker (Phoenix Suns) dhe Anthony Edwards (Minnesota Timberwolves).
