I akuzuari Naim Murseli në deklarimin e tij para trupit gjykues ka rrëfyer për natën kritike kur u vra Liridona Ademaj.
Murseli është i akuzuari kryesor për vrasjen e tij. Ai ka mohuar se në natën e vrasjes e ka mbajtur me dorë Liridona Ademajn, siç përshkruhet në aktakuzë. Murseli madje ka mohuar se ka qenë në makinë në momentin kur Liridona u qëllua për vdekje.
Sipas tij akti u krye nga një person i maskuar, i cili paraprakisht mori paratë që kishin dhe telefonin e Liridonës.
Murseli thotë se u largua me fëmijët duke menduar se edhe Liridona ishte pas tyre, ngase mendimi i tij fillestar ishte se sulmuesi kishte cak veturën e tyre shkruan Reporteri.net
“Nga ana e majtë e ime, nga therrat aty del një person i maskuar në mes të rrugës duke na drejtuar armën. Unë isha vozitës, Liridona pasagjere e fëmija prapa. Liridona tha “o kuku hajni”, diçka kështu dhe unë e ngadalësoj, e nali makinën dhe i ngrit duart tërë kohën dhe personi i maskuar afrohet te dritarja ku ishte Liridona ulur. Ajo e hap dritaren në gjysmë, apo se di sa dhe unë i kisha paratë në xhep se kuletë nuk mbaj kurrë dhe telefonin e kisha. Ai e zgjat dorën dhe i merr ato, paratë dhe telefonin ia jep Liridona të vetin dhe paratë që i kishte. Ishin disa qindra euro, jo më shumë. Unë kam mendu që grabitja po bëhet për veturë, sepse siç tha më doli një person përpara, se kam pa që ka qenë me makinë. Kjo është arsyeja pse kam dalë prej veturës dhe kur kam dalë më ka thanë telefonin. E kam zgjat dorën dhe e ka marrë telefonin mbi tavan të kerrit. E kam hapën derën e kerrit të fëmijëve dhe fëmija kanë dalë dhe unë pas tyre. Tu mendu që unë kur të dal, ai ia lëshon rrugën Liridonës dhe e merr kerrin dhe pas vetëm disa sekondash kam dëgjuar krismën, më janë dukur si dy krisma dhe kam mendu se po gjuan në drejtim tonin. Nuk kam guxuar të kthehem mbrapa por kam vazhduar me fëmijët, pas disa sekondash e kthej kokën dhe e shoh se nuk është Liridona askund. Në atë moment vjen ajo vetura e zezë në drejtim të fëmijëve dhe timin. Ishte shumë afër me na goditë, nuk e di pse dhe në atë moment e ka kthyer timonin dhe ka vazhduar. Edhe atëherë ishte i maskuar. Unë në aktakuzë akuzohem që e kam mbajtë me dorë gruan time në momentin e fundit të jetës. Unë ju betohem në dy fëmijët që Naim Murseli as në makinë nuk ka qenë kur është vra Liridona, as unë dhe fëmijët. Ajo që e thotë prokurorja është shpifje”, tha Murseli në Gjykatë.
Seanca në këtë rast është duke vazhduar. /Reporteri.net/
