Çaji jeshil, i njohur për vetitë e tij dobësuese, po përdoret gjithnjë e më shumë si një përbërës natyral me ndikim pozitiv në shëndet. Përveç ndihmës në kontrollin e peshës trupore, ai kontribuon edhe në parandalimin e disa sëmundjeve.
Falë përmbajtjes së lartë të antioksidantëve, substancave antiinflamatore dhe vetive diuretike, çaji jeshil ndihmon organet të eliminojnë toksinat nga trupi dhe përmirëson funksionimin e përgjithshëm të organizmit.
Mbron shëndetin e zemrës
Antioksidantët që përmban çaji jeshil ndihmojnë në parandalimin e akumulimit të kolesterolit të keq në arterie, duke ulur rrezikun e formimit të pllakave dhe përmirësuar qarkullimin e gjakut. Po ashtu, ai ndihmon në rregullimin e lipideve dhe redukton rrezikun e tensionit të lartë të gjakut dhe sëmundjeve kardiake kronike.
Ndihmon në luftën kundër mbipeshës
Katekinat që gjenden në çajin jeshil ndikojnë pozitivisht në metabolizëm, duke rritur djegien e kalorive. Kjo pije ofron edhe ndjenjë ngopjeje, duke ndihmuar në kontrollin e oreksit dhe reduktimin e konsumit të tepërt të ushqimit.
Ngadalëson plakjen e parakohshme
Si një burim i pasur me antioksidantë, vitamina dhe kripëra minerale, çaji jeshil ndihmon në mbrojtjen e qelizave nga stresi oksidativ dhe plakja e parakohshme. Flavonoidët dhe vitamina E kontribuojnë në rigjenerimin e qelizave dhe mbrojtjen e organeve nga sëmundjet që lidhen me moshën.
Ekspertët sugjerojnë se konsumimi i rregullt i çajit jeshil, si pjesë e një stili jetese të shëndetshëm, mund të sjellë përfitime të shumta për organizmin.
