Ikona e modës dhe disenjatorja britanike, Victoria Beckham, është nderuar me një nga vlerësimet më prestigjioze kulturore në Francë, duke u shpallur “Kalorëse e Urdhrit të Arteve dhe Letërsisë” (Chevalière de l’Ordre des Arts et des Lettres).
Ceremonia u mbajt në Paris dhe është raportuar nga revista Vogue. Me këtë rast, Beckham shprehu mirënjohjen e saj të thellë ndaj institucioneve franceze, familjes dhe ekipit të saj profesional për mbështetjen dhe besimin e vazhdueshëm në vizionin e saj kreativ.
Kjo ngjarje shënoi gjithashtu paraqitjen e parë publike të përbashkët të familjes Beckham, pas raportimeve për tensione familjare, të nxitura nga një postim i fundit në Instagram i djalit të madh, Brooklyn Beckham, i cili kishte lënë të kuptohej për një distancim nga familja.
Në kryeqytetin francez, Victoria u shoqërua nga bashkëshorti i saj, ish-futbollisti i njohur David Beckham, si dhe nga fëmijët Romeo (23), Cruz (20) dhe Harper (14).
Gjatë fjalimit të saj, Beckham falënderoi Ministrinë Franceze të Kulturës dhe ministren Rachida Dati për këtë vlerësim, duke theksuar rolin e veçantë që Franca i jep modës si formë arti.
“Jam jashtëzakonisht krenare për rrënjët e mia britanike, por Franca është një nga vendet e rralla ku moda trajtohet me seriozitet dhe respekt si art”, u shpreh ajo.
Ish-anëtarja e grupit Spice Girls theksoi se ky nderim nuk përfaqëson një sukses individual, por është rezultat i një pune të përbashkët shumëvjeçare.
“Pas çdo koleksioni qëndrojnë shumë njerëz – nga dizajni dhe atelierët, te prodhimi dhe komunikimi. Ky çmim i përket të gjithë atyre që kanë kontribuar në këtë rrugëtim”, tha Beckham, duke falënderuar ekipin e brendit të saj të modës dhe kozmetikës.
Në fjalën e saj, ajo nuk la pa përmendur familjen, duke shprehur falënderime për prindërit dhe fëmijët e saj, të cilët, sipas saj, kanë besuar gjithmonë në vizionin e saj.
Pas ceremonisë, Beckham ndau edhe një mesazh emocional në Instagram, ku veçoi falënderimet për bashkëshortin e saj, David Beckham, me të cilin është e martuar prej 26 vjetësh.
“Jam thellësisht e nderuar që jam shpallur ‘Chevalière de l’Ordre des Arts et des Lettres’ nga Ministria Franceze e Kulturës. Gjithmonë kam admiruar estetikën franceze dhe mënyrën se si moda trajtohet si art”, shkroi ajo.
Në fund të mesazhit, Beckham falënderoi ministren Rachida Dati, partnerët e saj të biznesit dhe familjen, duke e veçuar David Beckhamin si mbështetësin dhe investitorin e saj të parë.
“Jam pafundësisht mirënjohëse. Ti je gjithçka për mua”, përfundoi ajo.
