India dhe Bashkimi Europian kanë arritur të martën një marrëveshje tregtare historike, ka njoftuar kryeministri i Indisë, Narendra Modi. Marrëveshja vjen në një kohë kur të dyja palët po kërkojnë të mbrohen nga pasiguritë në marrëdhëniet tregtare me Shtetet e Bashkuara të Amerikës, raportoi Reuters.
Pas gati dy dekadash negociatash të ndërprera herë pas here, kjo marrëveshje hap rrugën që India të liberalizojë tregun e saj të madh dhe të mbrojtur për tregti të lirë me 27 shtetet anëtare të Bashkimit Europian, i cili është partneri më i madh tregtar i vendit.
“Dje u nënshkrua një marrëveshje e madhe ndërmjet Bashkimit Europian dhe Indisë”, deklaroi Modi, duke shtuar se marrëveshja po konsiderohet globalisht si “amë e të gjitha marrëveshjeve”. Sipas tij, ajo do të krijojë mundësi të mëdha ekonomike për rreth 1.4 miliardë qytetarë të Indisë dhe për miliona njerëz në Europë.
Gjatë ditës, Modi dhe presidentja e Komisionit Europian, Ursula von der Leyen, pritet të bëjnë një deklaratë të përbashkët në kuadër të samitit Indi–BE që po mbahet në Nju Delhi, ku do të publikohen edhe detajet e marrëveshjes.
Tregtia ndërmjet Indisë dhe Bashkimit Europian arriti në 136.5 miliardë dollarë gjatë vitit fiskal që përfundoi në mars 2025. Marrëveshja Indi–BE vjen vetëm disa ditë pas nënshkrimit të paktit tregtar mes BE-së dhe bllokut të Amerikës së Jugut, Mercosur, si dhe pas marrëveshjeve të mëparshme me Indonezinë, Meksikën dhe Zvicrën.
Në të njëjtën periudhë, India ka përmbyllur marrëveshje tregtare edhe me Britaninë e Madhe, Zelandën e Re dhe Omanin. Kjo valë marrëveshjesh pasqyron përpjekjet globale për të zvogëluar varësinë nga SHBA-ja, në një kohë kur presidenti amerikan Donald Trump ka tensionuar marrëdhëniet me aleatët perëndimorë përmes tarifave dhe politikave të reja tregtare.
Trump ka vendosur tarifa prej 50 për qind për mallrat nga India, ndërsa marrëveshja tregtare Indi–SHBA u prish vitin e kaluar pas ndërprerjes së komunikimit ndërqeveritar.
Sipas një zyrtari indian të informuar me procesin, nënshkrimi formal i marrëveshjes Indi–BE pritet të bëhet pas përfundimit të verifikimeve ligjore, të cilat mund të zgjasin pesë deri në gjashtë muaj. “Ne presim që marrëveshja të hyjë në fuqi brenda një viti”, ka deklaruar ai.
