Misioni i Policisë së Kosovës, sot në Mitrovicë të Veriut, ishte i qartë: arrestimi i Milun Milenkoviçit, i cili mes tjerash, dyshohet të jetë ndër organizatorët e sulmeve më 29 maj në Zveçan, në të cilat rreth 30 pjesëtarë të KFOR-it mbetën të lënduar.
“Policia e Kosovës sot ka arrestuar Milun Milenkovic – Llune, një nga udhëheqësit e formacionit kriminal “Mbrojtja Civile” dhe prijësin e bandave kriminale, që ndër vite kanë terrorizuar qytetarët tanë, kanë sulmuar pjesëtarët e Policisë së Kosovës dhe institucionet e Republikës së Kosovës. Ai ka qenë edhe organizatori kryesor i sulmeve ndaj forcave të KFOR-it dhe Policisë së Kosovës në Zveçan”, tha ministri i Punëve të Brendshme, Xhelal Sveçla.
Arrestimi i trajnerit të kikboksit, të njohur me nofkën Llune, nxiti reagimin e serbëve lokalë. Si pasojë, tre pjesëtarë të Policisë së Kosovës mbetën të lënduar.
“Gjatë arrestimit të tij, janë sulmuar zyrtarët e Policisë së Kosovës, tre nga të cilët janë të lënduar lehtë”, tha Sveçla.
Serbët nuk sulmuan vetëm zyrtarët policorë. Shënjestër e dhunës nga ta ishte edhe i pari i Listës Serbe, Goran Rakiç.
Pas arrestimit të Milenkoviçit, njësite të konsiderueshme të Policisë së Kosovës u vendosën në Lagjen e Boshnjakëve, ku nuk qëndruan gjatë.
Ndërkohë, as hyrja me vetura në Mitrovicë të Veriut nuk u lejua.
Me shpërndarjen e policisë, në Lagjen e Boshnjakëve, u panë automjete të KFOR-it amerikan dhe të EULEX-it, derisa një grup i serbëve u pa teksa qëndronte në dy anët e rrugës, disa metra larg lagjes së banuar me shqiptarë.
Avni Peci, përfaqësues i kësaj Lagjeje, thotë se kjo situatë nuk i shqetëson banorët, pasi ata janë mësuar me situata të tilla. Megjithatë, ai ka një thirrje për banorët e të gjitha komuniteteve.
“I bëj thirrje banorëve të të gjitha komuniteteve që të mos politizohen nga qarqe të ndryshme politike që operojnë këtu”, tha Peci.
Aksioni i sotëm policorë erdhi pak orë pas takimit që kryeministri Albin Kurti, pati me ambasadorët e shteteve të Quintit. /atvlive.tv
Edicionin Qendror të lajmeve në ATV e gjeni në videon më poshtë:
