Negociatorët kryesorë nga Shtetet e Bashkuara dhe Ukraina thanë të premten se kanë zhvilluar bisedime konstruktive për t’i dhënë fund luftës në Ukrainë, por rruga drejt paqes varet nga Rusia.
“Përparimi i vërtetë drejt çdo marrëveshjeje varet nga gatishmëria e Rusisë për të treguar angazhim serioz për paqe afatgjatë, duke përfshirë hapat drejt de-përshkallëzimit dhe ndërprerjes së vrasjeve,” thanë në një deklaratë të përbashkët i dërguari i posaçëm amerikan Steve Witkoff dhe dhëndri i presidentit Donald Trump, Jared Kushner, së bashku me negociatorët ukrainas.
Gjatë takimit, të dy palët “ranë dakord për kuadrin e marrëveshjeve të sigurisë” dhe diskutuan çështje të parandalimit, raporton BBC, transmeton Sinjali.
Bisedimet në Moskë të martën nuk çuan në ndonjë kompromis për një marrëveshje paqeje në luftën gati katërvjeçare. Takimi dyditor mes Witkoff dhe Kushner me sekretarin ukrainas të sigurisë kombëtare, Rustem Umerov, dhe gjeneralbrigadier Andriy Hnatov ishte raundi i gjashtë i bisedimeve brenda dy javësh. Ata do të takohen sërish në Florida të shtunën.
Në deklaratë, të katër theksuan se prioriteti i Ukrainës është “sigurimi i një marrëveshjeje që mbron pavarësinë dhe sovranitetin e saj, garanton sigurinë e qytetarëve dhe krijon themele të qëndrueshme për një të ardhme demokratike dhe të begatë”.
Ata diskutuan gjithashtu takimin që SHBA-ja pati më herët gjatë javës me presidentin rus Vladimir Putin, si dhe të ardhmen e Ukrainës pas luftës, e cila përfshin rindërtimin e vendit të shkatërruar dhe nisma ekonomike me SHBA-në.
Arritja e një armëpushimi dhe ulja e tensioneve janë të nevojshme për të “parandaluar agresionin e përtërirë dhe për të bërë të mundur planin gjithëpërfshirës të rindërtimit të Ukrainës, i hartuar që ta bëjë vendin më të fortë dhe më të begatë se para luftës,” u tha në deklaratë.
Të paktën dy pika të mëdha mosmarrëveshjeje vazhdojnë të mbeten mes Moskës dhe Kievit – fati i territoreve ukrainase të pushtuara nga forcat ruse dhe garancitë e sigurisë për Ukrainën.
Witkoff kaloi pothuajse pesë orë me Putinin në Moskë të martën, në negociata që Kremlini tha se nuk prodhuan “asnjë kompromis” për përfundimin e luftës. Kushner, biznesmen dhe investitor në pasuri të paluajtshme, i cili ka shërbyer si këshilltar i Trump gjatë mandatit të parë presidencial, ishte gjithashtu i pranishëm.
Trump tha se ato bisedime ishin “mjaft të mira”, por ende ishte shumë herët për të thënë çfarë do të ndodhte.
Të mërkurën, presidenti ukrainas Volodymyr Zelensky deklaroi se “bota e ndien qartë se ekziston një mundësi e vërtetë për t’i dhënë fund luftës”, por negociatat duhet të “shoqërohen me presion ndaj Rusisë”.
