Kryeministri i Australisë, Anthony Albanese, është martuar me partneren e tij, Jodie Haydon, duke u bërë kryeministri i parë në historinë e vendit që kurorëzon martesën ndërsa është në detyrë.
Çifti i dha fund beqarisë të shtunën pasdite në Kanberra, vetëm një ditë pas seancës së fundit parlamentare për këtë vit, transmeton BBC.
“Jemi jashtëzakonisht të lumtur që ndamë dashurinë dhe zotimin tonë për të kaluar jetën së bashku, përpara familjes dhe miqve tanë më të afërt,” deklaroi Albanese.
Çifti u fejua Ditën e Shën Valentinit vitin e kaluar, me propozimin dhe pritjen e dasmës të zhvilluara në rezidencën zyrtare të kryeministrit, “The Lodge”. Për shkak të shqetësimeve për sigurinë, planet e dasmës mbetën të fshehta deri në ditën e madhe.
Në ceremoni morën pjesë prindërit e znj. Haydon, djali i Albaneses nga martesa e parë dhe qeni i tyre, Toto, i cili ishte mbajtësi i unazave.
Çifti u largua nga altari nën tingujt e këngës së Stevie Wonder, “Signed, Sealed, Delivered (I’m Yours)”. Disa ministra të kabinetit gjithashtu ishin të pranishëm.
Gjatë pritjes, vallëzimi i tyre i parë u zhvillua nën tingujt e këngës “The Way You Look Tonight” nga Frank Sinatra, ndërsa festës iu shtuan edhe kanaçe birre të personalizuara me fotografinë e çiftit.
Çifti do të kalojë muajin e mjaltit në Australi, duke filluar nga e hëna deri të premten e ardhshme, plane të thjeshtuara pas rizgjedhjes së Albaneses në maj. Albanese, 62 vjeç, dhe Haydon, 47 vjeçe, u takuan për herë të parë në vitin 2020 në një darkë biznesi në Melburn.
Znj. Haydon e ka shoqëruar kryeministrin gjatë fushatave zgjedhore të viteve 2022 dhe 2025, si dhe në ngjarje të rëndësishme ndërkombëtare, përfshirë funeralin e Mbretëreshës Elizabeth II dhe darkën shtetërore të organizuar nga ish-presidenti amerikan Joe Biden.
Albanese tashmë ka hyrë në historinë australiane si kryeministri i parë që fejohet dhe martohet gjatë mandatit.
Pas fejesës, çifti kishte deklaruar: “Jemi me të vërtetë me fat që e kemi gjetur njëri-tjetrin.”
