Policia e Kosovës ka arrestuar një të dyshuar 19-vjeçar për tentativë grabitje dhe mbajtje të armëve pa leje në Prishtinë.
Sipas Policisë, rasti ka ndodhur mbrëmjen e kaluar, kur i dyshuari, nën kërcënimin e armës, ka tentuar të kryejë një grabitje. Falë reagimit të shpejtë të zyrtarëve të stacionit policorë Veriu në Prishtinë dhe punës intensive hetimore, ka arritur të identifikohet dhe të arrestohet personi.
I dyshuari, B.M., një mashkull 19-vjeçar, është dërguar në mbajtje për 48 orë, pas një vendimi të Prokurorit të Shtetit.
Ai është nën hetim për veprat penale “Grabitje në tentativë” dhe “Mbajtje në pronësi, kontroll ose posedim të paautorizuar të armëve”.
Policia e Kosovës ka theksuar se po vazhdon angazhimin e saj për sigurinë publike dhe do të ndërmarrë veprime të shpejta dhe profesionale ndaj çdo veprimi kriminal që kërcënon rendin dhe sigurinë në vend.
