Ministri i Jashtëm i Serbisë, Marko Gjuriq, ka deklaruar sot se Botsuana mbështet qëndrimin e Serbisë lidhur me Kosovën, për çka u shpreh veçanërisht mirënjohës, duke theksuar se të dy vendet ndajnë mirëkuptimin për nevojën e “respektimit të së drejtës ndërkombëtare” si bazë për ruajtjen e paqes në botë.
Ministri i Jashtëm i Botsuanës, Phenyo Butale, ka thënë se vendi i tij dhe Serbia ndajnë të njëjtat vlera, sidomos “sa i përket respektimit të së drejtës ndërkombëtare dhe ruajtjes së integritetit territorial”.
“Botsuana e ka shprehur miqësinë e saj duke mbështetur qëndrimin tonë mbi shpalljen “e njëanshme të pavarësisë së Kosovës dhe Metohisë”, dhe jemi posaçërisht mirënjohës për mbështetjen e Botsuanës ndaj “integritetit territorial dhe sovranitetit” të Serbisë,” ka pretenduar Gjuriqi në konferencën e përbashkët pas takimit me ministrin e Jashtëm të Botsuanës, Phenyo Butale.
Ai gjithashtu ka shtuar se “e ka informuar” kolegun e tij mbi situatën aktuale në Kosovë.
“Serbia dhe Botsuana ndajnë një mirëkuptim më të gjerë për nevojën e respektimit të së drejtës ndërkombëtare si themel i ruajtjes së paqes dhe barazisë në botë, gjë që është jashtëzakonisht e rëndësishme në rrethanat e sotme”, ka përfunduar Gjuriqi me demagogjinë e tij tashmë të njohur.
