Bota e artit u trazua këtë javë nga një shitje historike: një pikturë e rrallë e Gustav Klimt, mjeshtrit të modernizmit austriak, u shit për 236 milionë dollarë, duke hyrë direkt në listën e veprave më të shtrenjta të shitura ndonjëherë.
Klimti njohur për stilin e tij të pasur dekorativ, përdorimin e arit dhe portretet ikonike që ndërthurin simbolizmin me sensualitetin, ka qenë prej kohësh ndër artistët më të vlerësuar në tregun botëror të artit. Rrallësia e veprave të tij në qarkullim ka bërë që çdo paraqitje në ankand të ndezë menjëherë interes të jashtëzakonshëm nga koleksionistët elitarë. Këtë herë, gara për blerjen e pikturës shpërtheu që në sekondat e para, duke çuar çmimin shumë përtej parashikimeve.
Ekspertët thonë se rezultati reflekton jo vetëm ndikimin e pa shuar të Klimt në historinë e artit, por edhe oreksin gjithnjë e më të madh të koleksionuesëve për vepra të kësaj cilësie. Për tregun ndërkombëtar, kjo shitje shënon një tjetër kulm në një vit të tejmbushur me rekorde.
Ndërsa identiteti i blerësit mbetet i fshehtë, një gjë është e sigurt, kjo vepër prej 236 milionë dollarësh ka forcuar edhe më shumë pozicionin e Gustav Klimt si një nga mjeshtrit më të çmuar të shekullit XX dhe e ka futur pikturën në historinë e artit bashkëkohor.
