Të enjten, më 20 nëntor, qytetarët nga e gjithë Shqipëria do të mblidhen në Sheshin Skënderbej për një protestë paqësore, por vendimtare, kundër mizorive të kryera ndaj kafshëve endacake.
Aktivistë, vullnetarë dhe qytetarë të thjeshtë i bëjnë thirrje publikut të bashkohet për të kërkuar hetim, transparencë dhe ndalimin e praktikave çnjerëzore që prej vitesh kryhen ndaj qenve të rrugës, shpesh me fonde publike dhe pa asnjë përgjegjësi ligjore. Protesta synon të ngrejë zërin për qindra raste të helmimeve, zhdukjeve dhe abuzimeve, duke kërkuar reagim urgjent nga institucionet shqiptare dhe vëmendjen e partnerëve ndërkombëtarë.
Kjo është një thirrje kombëtare për drejtësi dhe llogaridhënie. Protestuesit kërkojnë ndalimin e mekanizmave të eliminimit të qenve endacakë, hetim të thelluar nga SPAK mbi përdorimin e fondeve bashkiake, dënime reale për abuzuesit dhe transparencë të plotë në strehat veterinare. Demonstrata nis në 11:00 AM, në Sheshin Skënderbej, dhe organizatorët ftojnë të gjithë të marrin pjesë, sepse vetëm duke ngritur zërin sot mund të ndalet dhuna sistematike ndaj kafshëve nesër.
Njoftimi:
Bashkohu në protestë! Behu zëri i tyre
Shpërndajeni masivisht dhe sigurohuni të jeni aty. Nëse nuk ngremë zërin sot, mizoritë do të vazhdojnë nesër. Ju mirëpresim nga e gjithe Shqiperia.
Kërkojmë drejtësi për kafshët e pambrojtura!
E enjte, 20 Nëntor 2025
11:00 AM
Sheshi Skënderbej, Tiranë
Kërkesat tona:
1. Ndalimi i menjëhershëm i helmimeve dhe çdo forme tjetër të zhdukjes së qenve endacakë në gjithë Shqipërinë.
2. Ndjekje penale dhe largim i menjëhershëm nga detyra për çdo person apo punonjës shtetëror që abuzon me detyrën dhe kryen krime ndaj kafshëve.
3. Hetim nga SPAK për fondet që bashkitë perdorin për qentë endacakë dhe transparencë se ku përfundojnë. Hetim per numrin e qenve qe marrin ne Strehezat Veterinare dhe ku perfundojne ata.
4. Përfshirja e strukturave të BE-së për forcimin e bazës ligjore dhe zbatimin real të dënimeve jo vetëm ligje vetem në letër.
5. Angazhimi i organizatave dhe ambasadave të huaja në mbështetje të kauzës sonë.
6. Akses i përditshëm për vullnetarët në Strehën Veterinare Tiranë dhe në çdo zonë ku mbahen qentë.
