Kapiteni i Inter Miamit, Lionel Messi, mori çelësin simbolik të qytetit të Majamit nga kryebashkiaku Francis Suarez gjatë një ceremonie të mbajtur të mërkurën në mbrëmje në Kaseya Center, pas fjalës së tij në America Business Forum.
“Faleminderit, ndihem shumë i nderuar. Kemi ndier dashurinë dhe mbështetjen që nga ditët e para në Miami. Është një nder i madh për mua të marr këtë çmim,” tha Messi gjatë ceremonisë.
Argjentinasi kujtoi gjithashtu periudhën pas largimit nga Barcelona dhe transferimin te PSG:
“Transferimi në Paris ishte i vështirë, sepse kishim jetuar gjithë jetën në Barcelonë. Familja, miqtë, e gjithë jeta jonë ishte atje. Ishte e vështirë për mua të përshtatesha dhe nuk po e shijoja futbollin. Por pastaj morëm një vendim familjar për të vazhduar karrierën në Miami dhe ishte gjëja më e mirë që mund të na ndodhte,” u shpreh Messi.
Gjatë vitit 2025, Messi ka shënuar 40 gola dhe ka dhënë 20 asiste në 47 ndeshje. /ATVLIVE.TV
