Bashkimi Evropian ka vlerësuar të martën progresin e Ukrainës në zbatimin e reformave për t’u bashkuar me bllokun, pavarësisht shqetësimeve të vazhdueshme për përpjekjet e saj në luftimin e korrupsionit.
Në raportet e fundit vjetore për zgjerimin, Komisioni Evropian ka dhënë gjithashtu paralajmërime të ashpra për Serbinë dhe Gjeorgjinë, për shkak të prapambetjes demokratike që po shënohet në këto vende.
Sipas Komisionit Evropian, Mali i Zi mund të përfundojë bisedimet e anëtarësimit në BE deri në fund të vitit të ardhshëm, duke e bërë vendin e parë në radhë për t’u bërë anëtari i 28-të i Bashkimit Evropian.
Raportet përfshijnë gjithsej 10 vende, shumica e tyre nga Ballkani Perëndimor, në një periudhë kur procesi i zgjerimit të BE-së konsiderohet pothuajse i bllokuar.
Kroacia ka qenë vendi i fundit që është anëtarësuar në bllok, 12 vjet më parë.
Pengesat e brendshme në BE
Franca ka këmbëngulur se Bashkimi Evropian duhet të reformohet nga brenda përpara se të pranojë anëtarë të rinj, duke e konsideruar strukturën aktuale si tepër të ndërlikuar.
Ndërkohë, vetot kombëtare të ushtruara nga Hungaria dhe gjithnjë e më shumë nga Sllovakia kanë ngadalësuar proceset vendimmarrëse dhe ekzekutive të BE-së, bllokut më të madh tregtar në botë.
Perspektiva e anëtarësimit në BE vazhdon të mbetet një nxitës i fuqishëm për reforma pro-demokratike, duke nxitur tregtinë dhe krijimin e vendeve të reja të punës. Megjithatë, shpresat në Ballkanin Perëndimor janë zbehur për shkak të dështimit të bllokut për të përmbushur angazhimet e tij ndaj vendeve aspirante.
Ukraina, përparim në reforma, por luftë e ngadalshme kundër korrupsionit
Pothuajse katër vjet pas pushtimit në shkallë të plotë nga Rusia, Komisioni Evropian ka vlerësuar Ukrainën për avancimin në reformat kryesore, por ka theksuar se është bërë “përparim i kufizuar” në luftën kundër korrupsionit.
Një projektligj i diskutueshëm, që shihej si kërcënim për pavarësinë e agjencive kundër korrupsionit, shkaktoi këtë vit protesta të mëdha publike – të parat që nga fillimi i luftës – përpara se ligji të tërhiqej.
Komisioni ka theksuar gjithashtu se agjencitë dhe grupet e shoqërisë civile në Ukrainë po raportojnë presion në rritje nga shteti dhe shërbimet e sigurisë.
Sipas tij, “këto zhvillime hedhin dyshime mbi angazhimin e Ukrainës ndaj agjendës së saj kundër korrupsionit”.
Megjithatë, raporti thekson se Ukraina mbetet e përkushtuar ndaj qëllimit ambicioz të përfundimit të bisedimeve të pranimit deri në fund të vitit 2028.
“Për të përmbushur qëllimin, kërkohet një përshpejtim i ritmit të reformave, veçanërisht në lidhje me sundimin e ligjit”, thuhet në raportin e Komisionit Evropian.
Reagimi i Zelenskyt
Në një postim në Telegram, presidenti Volodymyr Zelensky e ka përshëndetur raportin si “provë se edhe pse vazhdon të mbrohet kundër agresionit në shkallë të plotë rus, Ukraina vazhdon të reformohet dhe të ndryshojë në përputhje me standardet evropiane”.
