Kombëtarja shqiptare ka zhvilluar pasditen e djeshme seancën e radhës stërvitore në “Shtëpinë e Futbollit”, në kuadër të përgatitjeve për ndeshjet e rëndësishme ndaj Serbisë dhe Jordanisë.
Sipas njoftimit nga Departamenti i Komunikimit në FSHF, të gjithë lojtarët ishin në dispozicion të trajnerit Silvinjo dhe morën ngarkesën e plotë stërvitore, ndërsa mbrojtësi Enea Mihaj u bashkua me ekipin, duke kryer një seancë të veçuar.
Stërvitja nisi me ushtrime në palestër dhe më pas ekipi zhvilloi disa skema taktike në fushë, me trajnerin Silvinjo që testoi situata të ndryshme loje në prag të dy sfidave të radhës.
Ndërkohë, tekniku brazilian ka vendosur të ftojë në Kombëtare mesfushorin Nazmi Gripshi, i cili iu bashkua ekipit si zëvendësim për Adrion Pajazitin, që mungon për shkak dëmtimi. Gripshi u bashkua me skuadrën gjatë ditës së djeshme dhe prej sot është pjesë e plotë e përgatitjeve kuqezi.
Seanca e radhës stërvitore e Kombëtares do të zhvillohet sot në “Shtëpinë e Futbollit”, ndërsa dy futbollistë pritet të dalin para mediave në konferencën për shtyp që do të mbahet në “Air Albania”.
