KFOR-i ka deklaruar se nuk ka identifikuar asnjë shkelje të hapësirës ajrore të Kosovës përmes përdorimit të dronëve që do të përbënin rrezik për sigurinë në vend.
Në një përgjigje zyrtare, misioni i NATO-s në Kosovë thekson se çdo aktivitet ajror koordinohet me KFOR-in me qëllim që të shmangen tensionet dhe të garantohet siguria.
“Ne nuk kemi identifikuar shkelje përmes dronëve që mund ta cenojnë sigurinë në Kosovë. Komandanti i KFOR-it ka autoritet mbi hapësirën ajrore të Kosovës, në përputhje me Rezolutën 1244 të Këshillit të Sigurimit të OKB-së të vitit 1999, prandaj KFOR-i monitoron rregullisht hapësirën ajrore të Kosovës, përmes të gjitha mjeteve dhe kapaciteteve që ka në dispozicion”, thuhet në njoftim.
KFOR-i gjithashtu ka theksuar se mbetet në kontakt të ngushtë me institucionet e sigurisë së Kosovës dhe me Forcat e Armatosura të Serbisë, në funksion të ruajtjes së stabilitetit dhe sigurisë në rajon.
