Futbollisti izraelit Manor Solomon, aktualisht i huazuar nga Tottenham Hotspur te Villarreal, ishte në qendër të vëmendjes në fitoren 2-1 të skuadrës së tij kundër Sevillas në La Liga – jo vetëm për shkak të golit vendimtar, por edhe për polemikat politike që e shoqëruan para dhe gjatë ndeshjes.
26 vjeçari, u inkuadrua në lojë në minutën e 84-të të ndeshjes, e zhvilluar në stadiumin “Ramon Sanchez-Pizjuan”. Menjëherë pas hyrjes në fushë, ai u prit me fishkëllima, fyerje dhe thirrje politike nga një pjesë e tifozëve vendas – përfshirë edhe një deklaratë të ashpër të grupit ultras të Sevillas, Biris Norte.
Nga tribunat u dëgjuan thirrje si “Izraelitët janë vrasës”, ndërsa më herët, grupi ultras kishte publikuar një mesazh në rrjete sociale:
“Ky përkrahës i gjenocidit po na viziton shtëpinë. Jemi të qartë për këtë çështje… Nuk ka vend për sionistët në Nervion.”
Pavarësisht atmosferës së tensionuar, Solomon reagoi në mënyrën më sportive të mundshme, duke shënuar golin e fitores për Villarrealin – goli i katërt që i sjell fitoren klubit në këtë sezon.
Kjo nuk është hera e parë që Solomon përballet me sulme dhe komente të ashpra. Në tetor 2023, ai mori kritika dhe kërcënime pas mbështetjes publike që i dha Izraelit pas sulmit të Hamasit. Që atëherë, ai ka qenë objekt i ofendimeve në stadiume dhe sulmeve verbale në rrjete sociale.
Në dhjetor 2024, gjatë një ndeshjeje mes Leeds United dhe Stoke City, u dëgjuan thirrje antisemite ndaj tij, që detyruan klubin e Leeds-it të lëshonte një deklaratë dhe të njoftonte masa disiplinore kundër tifozëve përgjegjës.
Edhe jashtë fushës, Solomon është përballur me urrejtje. Në qershor 2025, kur klubi i tij publikoi një mesazh urimi për martesën me partneren Dana Voshina, postimi u përmbyt me komente fyese dhe akuza të rënda, duke e quajtur “sionist” dhe “vrasës fëmijësh”.
Po atë muaj, gjatë një udhëtimi drejt Izraelit për ceremoninë e martesës, izraeliti mbeti i bllokuar përkohësisht në vend për shkak të mbylljes së hapësirës ajrore, pas përshkallëzimit të konfliktit me Iranin – çka e vuri edhe më shumë në qendër të vëmendjes. /ATVLIVE.TV
