Pas takimit të kryeministrit Albin Kurti me Ambasadorët e QUINT-it të akredituar në Kosovë, Jeffrey Hovenier është deklaruar rreth takimit, raporton EO.
Ambasadori amerikan ka treguar për këshillat që ia kanë dhënë Kurtit, se duhet të depërshkallëzohet situata në veri, teksa tha se edhe kryeministri është pajtuar me ta.
Ai ka treguar se takimi është thirrur nga vetë Kurti, ndërsa ka kërkuar që kryetarët e komunave veriore të mos punojnë nga zyrat e tyre për një kohë të shkurtër, në mënyrë që të arrihet depërshkallëzimi.
“Siç na kërkoi kryeministri Kurti, u takuam me të për të diskutuar për situatën në veri dhe për angazhimin tonë për implementimin e plotë të marrëveshjes së normalizimit. Diskutuam për rëndësinë e depërshkallëzimit të situatës dhe hapat për uljen e tensionit në veri”.
“I kërkuam kryeministrit që të ndërmarrë hapa për arritjen e depërshkallëzimit. Ka marrëveshje se depërshkallëzimi duhet të ndodhë, por jo për mënyrën se si duhet të ndodhë”.
“Ajo se çfarë ShBA-ja por edhe vendet e QUINT-it, po kërkojnë është që kryetarët e katër komunave veriore nuk kanë nevojë të punojnë nga zyrat e tyre çdo ditë. E rekomandojmë këtë në një kohë afatshkurte”.
Tutje, Hovenier ka thënë se ShBA i dënon rëndë protestat e dhunshme në veri.
“Jemi të shqetësuar për dhunën që është raportuar sot ndaj zyrtarëve në veri. Kemi parë grafitet në veturat e KFOR-it dhe dëgjuam për sulmet ndaj gazetarëve, të cilat i dënojmë rëndë. E respektojmë të drejtën e çdo qytetari që të protestojë paqësisht por jo duke përdorur dhunë e duke kërcënuar”.
