Dy ditë pasi Gjykata e Lartë në Suboticë i caktoi masën e paraburgimit prej një muaji, Arbnor Spahiut, ish-pjesëtar i Njësisë Speciale të Policisë së Kosovës, me dyshimin për përfshirje në rastin “Banjska”, kanë reaguar edhe krerët e shtetit, raporton ATV.
Nga presidenca kanë njoftuar se Presidentja Vjosa Osmani ka kontaktuar menjëherë Zyrën Ndërlidhëse në Serbi dhe është në komunikim të vazhdueshëm me shtetet e Quint-it dhe Zyrën e Bashkimit Evropian, dhe se rasti po trajtohet me prioritet të lartë.
Ndërkohë edhe Ministria e punëve të Jashtme ka konfirmuar se përfaqësuesi i Zyrës Ndërlidhëse të Kosovës në Serbi, Jetish Jashari, bashkë me avokatin e angazhuar nga familjarët, Arianit Koci, do të udhëtojë në Suboticë për të vizituar Spahiun në qendrën e paraburgimit.
Në të njëjtën linjë, edhe kryeministri në detyrë, Albin Kurti, ka reaguar përmes një postimi në Facebook, ku thekson se institucionet e Kosovës janë angazhuar që nga momenti i arrestimit për lirimin sa më të shpejtë të Spahiut.
Për këtë ngjarje ka reaguar edhe ministri në detyrë i Punëve të Brendshme, Xhelal Sveçla, i cili tha se çështja po trajtohet nga Ministria e Jashtme dhe kërkoi që situata të tilla të mos përsëriten më.
Arbnor Spahiu, ish-pjesëtar i Njësisë Speciale të Policisë së Kosovës, është ndaluar nga autoritetet serbe më 7 qershor në pikën kufitare me Hungarinë, teksa po udhëtonte për në Gjermani me familjen. /atvlive.tv
