Grupi parlamentar i Aleancës për Ardhmërinë e Kosovës me mbështetje nga deputetët e Lidhjes Demokratike të Kosovës (LDK) dhe Partisë Demokratike të Kosovës (PDK), i është drejtuar Gjykatës Kushtetuese për të saktësuar shkeljet e mudhshme kushtetuese gjatë tentimeve për ta zgjedhur kryeparlamentarin.
Nënkryetarja e Aleancës për Ardhmërinë e Kosovës, Time Kadrijaj tha se veprimet e ndërmarra në Kuvendin e Kosovës janë të patolerueshme dhe përbëjnë shkelje ligjore.
“Ne sot si Aleancë për Ardhmërinë e Kosovës me nënshkrimet e deputetëve të Aleancës, Lidhjes Demokratike të Kosovës por edhe të Partisë Demokratike të Kosovës, e kemi dërguar në Gjykatë Kushtetuese për interpretim të ndryshimit të votimit në mes të procedurave për zgjedhjen e kryeparlamentarit. Raporti është hartuar nga ekspertë të AAK-së, dhe ne kërkuam nga Gjykata Kushtetuese që kjo të trajtohet me prioritet, duke konsideruar që është shkelje ligjore, po mendojmë që po zhvlerësohet edhe vlera e kuvendit duke mbajtur seanca plenare çdo 48 orë dhe seanca të cilat i konsiderojmë që po shkelet Kushtetuta e Kosovës. I lutem akterët që ta trajtojnë me prioritet, ndoshta edhe me një pezullim të përkohshëm, me një masë të përkohshme për ndalim të mbajtjes së seancave, derisa gjykata me prioritet ta trajtojë këtë lëndë dhe ta merr një vendim”, tha ajo.
Pas dorëzimit së lëndës në Kushtetuese, Kadrijaj tha se kryesuesi i seancës konstituive më 5 maj ka ndryshuar formën e votimit për kryeparlamentaren.
“Ne gjithmonë i kemi respektuar vendimet e Gjykatës Kushtetuese, pavarësisht cilat janë. Ne asnjëherë nuk kemi thënë që një vendim që na konvenon ta pranojmë, e vendimet që nuk na pëlqejnë nuk i pranojmë. Dhe kjo qeveri ju e dini që është shkelësja më e madhe e vendimeve të Gjykatës Kushtetuese, duke bërë ligje anti-kushtetuese që kjo gjykatë i ka shpallur anti-kushtetuese dhe që kanë vazhduar t’i shkelin. Këta janë shkelësit më të mëdhenj të Kushtetutës së Kosovës. Ne, cili do që të jetë vendimi do ta respektojmë”, shtoi ajo.
Deputetja e AAK-së, Time Kadrijaj tha se i takon partisë fituese që të gjejnë zgjidhje në këtë situatë.
“Po luhet me imazhin e Kuvendit të Kosovës, shiheni nëpër seanca çdo 48 orë nuk ka askush nga ambasadorët e vendeve të QUINT-it apo zyrtarë që i përcjellin këto seanca, sepse po dihet rezultati, po dihet se çfarë po ndodhë. Kjo qeveri nuk ka reflektuar, ka pasur parti që kanë dhënë edhe opsione të tjera, që ndoshta ndonjë kandidat tjetër që është më konsensual do t’i kishte votat e opozitës, mirëpo këta po vazhdojnë me kandidatin e njëjtë. Është detyrë e tyre me gjet zgjidhje, nuk është detyrë e partive që kanë qenë në opozitë”, përfundoi Kadrijaj.
Nesër në orën 10:00 është paraparë vazhdimi i seancës konstituive, ku për të 15-tën herë do të tentohet konstituimi i legjislaturës së nëntë të Kuvendit të Kosovës.
Lëvizja Vetëvendosje sërish do të propozojë Albulena Haxhiun për kryeparlamentare, e cila nuk po arrin të sigurojë votat e mjaftueshme. /kp
