Hulumtuesi i Atlas Institute, Agron Demi, në emisionin CONTEXT në ATV, tha se tre muajt e fundit të qeverisjes së Vetëvendosjes janë pasqyrim i katër viteve të kaluara, duke mos sjellë rezultate konkrete, sidomos në investimet infrastrukturore.
Sipas tij, përkundër shpenzimeve të mëdha për investime kapitale, nuk ka pasur përmirësime reale në projekte të infrastrukturës.
“Është e vërtetë që buxheti për investime kapitale është shpenzuar me qindra miliona, por ka shkuar sidomos në shpronësime. Edhe nëse e shikon statistikat e transportit që i publikon çdo vit Agjencia e Statistikave të Kosovës, nga viti 2021 deri në vitin 2024 nuk ka asnjë metër më shumë të raportuar rrugë të asfaltuara apo rrugë me zhavorr”, tha Demi.
Ai tha se kjo situatë është një nga arsyet kryesore pse partia në pushtet ka humbur përkrahje në zgjedhjet e fundit.
“Ky është një dështim dhe po mendoj se është një prej arsyeve përse Vetëvendosje ka humbur një përqindje të madhe në krahasim me zgjedhjet e kaluara”, vlerësoi Demi.
Deklaratën e plotë të Agron Demit në CONTEXT, e gjeni në videon më poshtë:
