Kryetari i sapozgjedhur i Mitrovicës së Veriut, Erden Atiqi, ka njoftuar se ka emëruar katër drejtorë të rinj në kabinetin e tij në këtë komunë.
Në këtë pozita tash e tutje do të jenë dy gra dhe dy burra, duke përfshirë komunitetin shumicë shqiptarë si dhe pakicat serbe bashkë me ato boshnjake dhe egjiptiane, transmeton Paparaci. Së fundmi, ai tregoi se e ka vendosur Jeton Rrahmanin në pozitën e drejtorit të Drejtorisë për Komunitete Lokale dhe Kthim.
“Jetoni eshte studiues i drejtësisë, vjen nga radhët e komunitetit egjiptian. Aktivizmi i tij i gjatë me bazë në komunitet ka bërë që të njoh për së afërmi çështjet social-ekonomike të komuniteteve”, shkroi ai në Facebook.
Pozitën e drejtoreshës së Kulturës Rinisë dhe Sportit do ta ushtrojë Anesa Çollakoviq.
“Anesa ka përfunduar studimet master në zhvillimin ndërkombëtar në Ohio University në SHBA dhe ka përvojë me organizata ndërkombëtare dhe joqeveritare në fushën e kulturës rinisë dhe sportit”, tha Atiq.
Ndërkohë, drejtorinë e Arsimit në veri do ta udhëheqë Vid Janicijevic.
“Z. Janicijevic eshte studiues i historisë dhe arkeologjisë”, tha ai, teksa foli edhe për pozitën e Drejtoreshës për Urbanizëm, Kadastër dhe Gjeodezi. Në këtë funksion publik është vendosur Shenaj Llapashtica, përcjell Paparaci.
“Shenaji ka studijuar arkitekturë në Mimar Sinan Fine Arts University në Stamboll në Turqi. Shenaj Llapashtica ka përvojë pune shumëvjeqare në drejtorinë e kadastrit dhe urbanizmit”, ka shkruar Atiq.
