Vazhdimi i animuar i Disney-t ka grumbulluar një shumë të jashtëzakonshme prej 221 milionë dollarësh në debutimin e tij pesë-ditor në SHBA, njoftoi Disney, duke vendosur një rekord të ri për fundjavën më të suksesshme të Ditës së Falënderimeve në histori.
Rekordi i mëparshëm mbahej nga një tjetër vazhdim i Disney-t, “Frozen II”, i cili në vitin 2019 grumbulloi 125 milionë dollarë gjatë të njëjtës fundjavë.
“Moana 2” gjithashtu theu rekordin për hapjen më të madhe pesë-ditore ndonjëherë, sipas Disney-t, duke lënë pas “The Super Mario Bros. Movie” (204.6 milionë dollarë).
Kjo arritje vijon një muaj të fuqishëm për kinematë, pas suksesit të filmit “Wicked” që hapi me 112 milionë dollarë, ndërsa “Gladiator II” regjistroi 55 milionë dollarë në fundjavën e parë.
Suksesi i “Moana 2” gjithashtu shënoi një rikthim për animacionet e Disney-t. Vitet e fundit, disa prej filmave të kompanisë nuk patën pritshmëri të larta, duke përfshirë “Lightyear” nga seria “Toy Story,” aventurën shkencore “Strange World,” dhe “Wish,” një muzikal për princesha që festonte 100-vjetorin e Disney-t.
Disa analistë spekuluan se Disney kishte mësuar audiencat ta shikonin animacionin e tij në shtëpi, duke publikuar disa filma të Pixar-it direkt në platformën Disney+ gjatë pandemisë. Për këtë arsye, ata vlerësojnë se do të ishte e vështirë të riktheheshin familjet në kinematë tradicionale.
