Përgatiti: Pranvera Krasniqi
Mbi 4 hektarë tokë këtu në lagjen “Prishtina e Re” janë rezervuar për ndërtimin e spitalit të Prishtinës, fillet e projektit janë që nga paslufta.
Por, pavarësisht se lokacioni u sigurua dy vjet më parë, punimet nuk pritet të fillojnë shpejt, pasi komuna e Prishtinës ende nuk ka marrë dritën e gjelbër nga Ministria e Punëve të Brendshme.
“Në gusht e kemi dorëzuar një kërkesë në MPB për miratimin e planit për spitalin, po presim me reflektua bile edhe javën e kaluar e kemi ridërguar po ende nuk kemi marrë asnjë përgjigje”, tha drejtori i Shëndetësisë në Prishtinë, Izet Sadiku.
Sipas njohësve të shëndetësisë, një spital i nivelit sekondar në kryeqytet, do ta reduktonte dukshëm fluksin e pacientëve në QKUK.
“Atje ka shumë qytetarë të Prishtinës që shkojnë me marrë shërbime, ndërkohë që ish dashtë t’i kryejnë në spitalin e qytetit të tyre pra”, tha Bujar Vitia, gazetar i shëndetësisë.
Ndërkaq, nga opozita thotë se shëndetësia nuk ishte asnjëherë prioritet i qeverisjes aktuale. Mes tjerash, Leutrim Retkoceri nga PDK-ja ka kritika edhe për lokacionin ku pritet të ndërtohet spitali.
“Është larg qendrës pak, kanë shikuar shumë lokacione e kanë përzgjedhur më të papërshtatshmin, është pak lart atje mbi të gjitha edhe pak larg nga qendra”, tha Leutrim Retkoceri, shef i asamblistëve të PDK-së.
Por sipas të parit të shëndetësisë në Prishtinë, lokacioni i përzgjedhur është menduar mirë dhe se nuk do të ndryshohet.
“Përmes unazës së kryeqytetit, prishtinasit do të kenë qasje direkt në autostradë pa kaluar fare nëpër qendër dhe të shkojnë direkt në spital”, tha drejtori i Shëndetësisë, Izet Sadiku.
Kurdo që të fillojnë punimet, spitali pritet t’i ketë 200 shtretër të shpërndarë në departamentet e kirurgjisë, internistikës, gjinekologjisë dhe pediatrisë.
Për fillimin e projektit, vitin e kaluar, komuna e Prishtinës ndau 1.3 milionë euro kurse këtë vit 1.5 milionë euro, ndërkaq shuma e përgjithshme që nevojitet për ndërtimin e tërësishëm të spitalit është rreth 50 milionë euro.
