Bajram Gashi, me prejardhje nga Kosova dhe me vendbanim në Rijekë të Kroacisë, është raportuar i zhdukur në zonën e Mali Loshinjit duke alarmuar autoritetet lokale atje.
Sipas të dhënave nga Regjistri Kombëtar i Personave të Zhdukur, ai është parë për herë të fundit më 14 prill 2026, kur u largua nga vendbanimi i tij në drejtim të panjohur dhe nga ajo kohë nuk ka asnjë informacion për vendndodhjen e tij, shkruajnë mediat kroate.
Ai është shtetas kroat, i lindur në vitin 1964 në Sferkë të Klinës, me banim në Rijekë. Ai përshkruhet si rreth 190 centimetra i gjatë, me trup të hollë, flokë ngjyrë gështenjë dhe sy blu.
62 vjeçari, në momentin e zhdukjes, kishte të veshur një xhaketë të gjelbër prej kanavace, si dhe këpucë të bardha lëkure me thembra gri.
Policia u bën thirrje të gjithë qytetarëve që mund të kenë ndonjë informacion mbi lëvizjet apo vendndodhjen e tij, të kontaktojnë menjëherë stacionin më të afërt policor ose të telefonojnë në numrin emergjent 192.
